~~~~~~~~⊰❂ unicode ❂⊱~~~~~~~~

တာချီလိတ်တွင် တစ်နေ့အတွင်း ဆိုင်ကယ်က ကားကို ဝင်တိုက်မှုနှင့် ဆိုင်ကယ်ဖြင့် ဂိတ်မောင်းတံအား ဝင်တိုက်မှုတို့ဖြစ်ပွားပြီး လူငယ်(၁)ဦးသေ၊ (၂)ဦးဒဏ်ရာရ
*************
ရှမ်းပြည်နယ်(အရှေ့ပိုင်း) တာချီလိတ်မြို့တွင် ၂၀၁၈ ခုနှစ် နိုဝင်ဘာလ (၇)ရက်နေ့က ဆိုင်ကယ်က ကားကိုဝင်တိုက်မှုနှင့် ဆိုင်ကယ်က ဂိတ်မောင်းတံအား တိုက်မိမှုများ ဖြစ်ပွားပြီး လူငယ်(၁)ဦးသေ၊ (၂)ဦး ဒဏ်ရာရသွားကြောင်း သိရသည်။

တာချီလိတ်မြို့အထွက် ဝမ်ပုံသွားလမ်း ဝှေလေလန်ဂိတ်မှ မောင်းတံအား လူငယ်(၂)ဦးစီးနင်းလာသည့် ဆိုင်ကယ်က ည (၇)နာရီဝန်းကျင်က ဝင်တိုက်မိပြီး တစ်ဦးသေ၊ တစ်ဦးဒဏ်ရာရသွားသဖြင့် တာချီလိတ်နာရေးကူညီမှုအသင်းက တာချီလိတ်ပြည်သူ့ဆေးရုံသို့ ပို့ဆောင်ပေးထားကြောင်း သိရသည်။

“လူငယ် (၂)ယောက်ပဲ။ ဆိုင်ကယ်က မောင်းတံကို ဝင်တိုက်ထားတာ။ မောင်းတံက ကွေးသွားတယ်။ ဆိုင်ကယ်ကလည်း ဘေးကမြောင်းထဲထိုးကျသွားတယ်။ အရက်ကတအားမူးနေတာထင်တယ်။ တစ်ယောက်က စကားကို ကောင်းကောင်း မပြောနိုင်ဘူး။ အရက်မူးနေတာ”ဟု အခင်းဖြစ်နေရာတွင် လူနာသွားသယ်ပေးသည့် တာချီလိတ်နာရေးကူညီမှုအသင်း ဥက္ကဌ ဦးလှမိုးက တာချီလိတ်သတင်းအေဂျင်စီသို့ ပြောသည်။
အခင်းဖြစ်နေရာအား တာဝန်ရှိသူများက စစ်ဆေးဆောင်ရွက်နေပြီး ဒဏ်ရာရသူနှင့် သေဆုံးသူတို့အား အတည်မပြုနိုင်သေးကြောင်း သိရသည်။

နိုဝင်ဘာလ(၇)ရက်နေ့ နံနက်ပိုင်းကလည်း ဟောင်လိတ်ရပ်ကွက်၊ ဝမ်ဟောင်ဘုန်းကြီးကျောင်းရှေ့တွင် ကွေ့ရန်အချက်ပြထားသည့် ဒိုင်နာယာဉ်၏ အချက်ပြမီးကို သတိမထားဘဲ ဆိုင်ကယ်က ကျော်တက်ရာမှ ယာဉ်တိုက်မှုဖြစ်ပွားသဖြင့် ဆိုင်ကယ်မောင်းနှင်သည့် အသက်(၁၉)နှစ်အရွယ် လူငယ်မှာ ဒဏ်ရာရသွားကြောင်း သိရသည်။

“ကားက ကွေ့မယ့်ဘက်ကို ခေါင်းတည်ပြီး အချက်ပြမီးလည်း ပြထားတယ်။ နောက်က ဆိုင်ကယ်က ကျော်တက်တာမှာ ချိတ်မိသွားတာ။ ယာဉ်စည်းကမ်းအရဆိုရင် နောက်က ကျော်တက်မယ့်ယာဉ်က ရှေ့ကယာဉ်အချက်ပြတာကို ကြည့်ရတာပါ”ဟု တာဝန်ကျယာဉ်ထိန်းက ပြောသည်။

အဆိုပါလူငယ်အား တာချီလိတ်ပြည်သူ့ဆေးရုံကြီးသို့ ၎င်းဝင်ရောက်တိုက်မိသည့် မော်တော်ယာဉ်က လိုက်ပါပို့ဆောင်ပေးခဲ့ပြီး ယင်းမှတစ်ဆင့် မယ်ဆိုင်ဆေးရုံသို့ ရွှေ့ပြောင်းကုသမှုခံယူသဖြင့် တာချီလိတ်နာရေးကူညီမှုအသင်းက ပို့ဆောင်ကူညီပေးထားကြောင်း သိရသည်။

Tachileik News Agency
ဓါတ်ပုံ - တာချီလိတ်နာရေးကူညီမှုအသင်း