~~~~~~~~⊰❂ unicode ❂⊱~~~~~~~~

တာချီလိတ်တွင် မြောင်းဖုံးမရှိသည့် လမ်းဘေးရေမြောင်းအတွင်း ဆိုင်ကယ်ထိုးကျ တိမ်းမှောက်မှုနှင့် ဆိုင်ကယ်ကို အနောက်မှဝင်တိုက်မိပြီး ထွက်ပြေးမှုတို့ဖြစ်ပွား
************
ရှမ်းပြည်နယ်(အရှေ့ပိုင်း) တာချီလိတ်မြို့တွင် ၂၀၁၈ ခုနှစ်၊ နိုဝင်ဘာလ (၂၈)ရက်နေ့က မြောင်းဖုံးမရှိသည့် လမ်းမကြီးဘေးရေမြောင်းအတွင်း ဆိုင်ကယ်ထိုးကျတိမ်းမှောက်မှုနှင့် ဆိုင်ကယ်အားအနောက်မှ ဝင်တိုက်မိပြီး ထွက်ပြေးမှုတို့ ဖြစ်ပွားကြောင်း သိရသည်။

ဆန်ဆိုင်းရပ်ကွက်ရှိ ဆန်ဆိုင်းဈေးအနီးတွင် နေ့လယ်(၁)နာရီကျော်က အမျိုးသမီး(၂)ဦးစီးနင်းလာသည့် ဆိုင်ကယ်ကို အနောက်မှပါသည့် ဆိုင်ကယ်တစ်စီးက ဝင်တိုက်မိပြီး ထွက်ပြေးမောင်းနှင်သွားခြင်းဖြစ်ကြောင်း သိရသည်။

ယာဉ်တိုက်မှုကြောင့် အမျိုးသမီးတစ်ဦးမှာ လက်ကျိုးသွားသဖြင့် တာချီလိတ်နာရေးကူညီမှုအသင်းက ဆေးရုံသို့ ပို့ဆောင်ပေးထားကာ ယာဉ်ထိန်းရဲတပ်ဖွဲ့က အခင်းဖြစ်နေရာအား စစ်ဆေးပြီးနောက် တိုက်မိ ထွက်ပြေးသွားသည့် ဆိုင်ကယ်ကို ဖေါ်ထုတ်ဖမ်းဆီးနိုင်ခဲ့ကြောင်း သိရသည်။

“တိုက်ပြေးသွားတဲ့ဆိုင်ကယ်ကလူကို အတိုက်ခံရတဲ့မိန်းကလေးတွေက မှတ်မိလိုက်တယ်။ ယာဉ်ထိန်းတပ်ဖွဲ့က စုံစမ်းပြီး ဖမ်းမိသွားပြီလို့ သိရပါတယ်”ဟု တာချီလိတ်နာရေးကူညီမှုအသင်း ဥက္ကဌ ဦးလှမိုးက တာချီလိတ်သတင်းအေဂျင်စီသို့ ပြောသည်။

လွယ်စီတုံ ပုံလို့လမ်းမတွင် ည (၇)နာရီခွဲဝန်းကျင်က ကားကိုရှောင်တိမ်းလိုက်သည့်ဆိုင်ကယ်သည် မြောင်းဖုံးမရှိသည့် လမ်းဘေးရေမြောင်းအတွင်း ထိုးကျတိမ်းမှောက်သွားသဖြင့် ဆိုင်ကယ်မောင်းသူမှာ ဦးခေါင်း၌ ဒဏ်ရာရသွားကြောင်း သိရသည်။

ဆိုင်ကယ်တိမ်းမှောက်မှုဖြစ်ပွားရာသို့ တာချီလိတ်နာရေးကူညီမှုအသင်းက သွားရောက်ပြီး လူနာအား ဆေးရုံပို့ဆောင်ပေးခဲ့ကာ အခင်းဖြစ်နေရာအား ယာဉ်ထိန်းတပ်ဖွဲ့က စစ်ဆေးခဲ့ကြောင်း သိရသည်။

တာချီလိတ်မြို့တွင် ၂၀၁၈ ခုနှစ် အောက်တိုဘာလ (၃၁)ရက်နေ့ နံနက် (၁)နာရီဝန်းကျင်ကလည်း ဝိန်းကျောက်ရပ်ကွက်၊ တော်ကော့ရွာနှင့် မယ်ခေါင်ရပ်ကွက်သွား ကွန်ကရစ်တံတားအနီးလမ်းမတွင် မြောင်းဖုံးမရှိသည့် လမ်းဘေးရေမြောင်းအတွင်း ဆိုင်ကယ်ထိုးကျသွားသဖြင့် လူငယ်တစ်ဦး သေဆုံးသွားခဲ့သည်။

Tachileik News Agency
ဓါတ်ပုံ - တာချီလိတ်နာရေးကူညီမှုအသင်း