~~~~~~~~⊰❂ unicode ❂⊱~~~~~~~~

မြန်မာ - ထိုင်းနယ်စပ်ဒေသ တာချီလိတ်မြို့သို့ မြန်မာ - ထိုင်းချစ်ကြည်ရေး အမှတ်(၂)တံတားမှနေ၍ ဆိုဒီယမ်ဆိုင်ယာနိုက် ပေပါ(၃၀၀) တင်သွင်းလာသဖြင့် ဖမ်းဆီး အရေးယူခံထားရသည့် ထိုင်းနိုင်ငံသား တစ်ဦးကို ၂၀၁၈ ခုနှစ် နိုဝင်ဘာလ (၃)ရက်နေ့ နေ့လယ်ပိုင်းက ပြည်နှင်ဒဏ်ပေးလိုက်ကြောင်း သိရသည်။

အဆိုပါ ထိုင်းနိုင်ငံသားကို မြန်မာနိုင်ငံဘက်မှ တာချီလိတ်မြို့နယ် လဝကမှူး ဦးအောင်အောင်ထွန်း၊ မြန်မာ- ထိုင်းချစ်ကြည်ရေးတံတား(၂) တာဝန်ခံ ဒုလဝကမှူး ကြည်လင်းနှင့် တာဝန်ရှိသူများ ပါဝင်သည့် အဖွဲ့က ထိုင်းနိုင်ငံမှ တာဝန်ရှိသူများဖြစ်သည့် ထိုင်းလဝက ဦးစီးအရာရှိ ချာဒရီဒရူတာ ဦးဆောင်သည့် ထိုင်း TBC နှင့် နယ်ခြားစောင့်တပ်တို့ ပါဝင်သည့်အဖွဲ့သို့ လွှဲပြောင်းပေးလိုက်ခြင်းဖြစ်သည်။

မြန်မာဘက်မှ တာဝန်ရှိသူများက ပြည်နှင်ဒဏ်ပေးခံရသူအား မြန်မာ - ထိုင်းချစ်ကြည်ရေးတံတား (၂) နယ်စပ်မျဉ်းတွင် ထိုင်းဘက်သို့ လွှဲပြောင်းပေးလိုက်ခြင်းဖြစ်ပြီး ထိုင်းနိုင်ငံမှ တာဝန်ရှိသူများနှင့်အတူ ပြည်နှင်ဒဏ်ပေးခံရသူ၏ မိသားစုလည်း လိုက်ပါလာသည်ကို တွေ့ရသည်။

အဆိုပါ ထိုင်းနိုင်ငံသား Sawat Kaeodam သည် ၂၀၁၈ ခုနှစ် ဇွန်လ(၂)ရက်နေ့ နံနက်ပိုင်းက (၁၀)ဘီး ယာဉ်ဖြင့် ဆိုဒီယမ်ဆိုင်ရာနိုက် (Sodium Cyanide ) ပေပါ (၃၀၀)လုံးကို တာချီလိတ်ဘက်သို့ သယ်ဆောင် လာသည်ကို ထိုင်းနိုင်ငံ ONCB နှင့် သတင်းဖလှယ် ဆက်သွယ်မှုအရ မြန်မာနိုင်ငံ မူးယစ် ရဲတပ်ဖွဲ့သည် သက်ဆိုင်ရာ ပူးပေါင်းအဖွဲ့နှင့် အတူ မြန်မာ - ထိုင်း ချစ်ကြည်ရေးတံတား (၂)တွင် ဖမ်းဆီး ထိန်းသိမ်းနိုင်ခဲ့ခြင်းဖြစ်ကြောင်း သိရသည်။

ဆိုင်ယာနိုက်များ တရားမဝင်သယ်ဆောင်လာသည့် ထိုင်းနိုင်ငံ ကျင်းရှဲန်မြို့မှ အသက်(၄၂)နှစ်အရွယ် ထိုင်းနိုင်ငံသား Sawat Kaeodam သည် တာချီလိတ်မြို့မရဲစခန်းတွင် (ပ)၁၆၉/၂၀၁၈၊ ဓာတုပစ္စည်းနှင့် ဆက်စပ်ပစ္စည်းများ အန္တရာယ်မှ တားဆီးကာကွယ်ရေး ဥပဒေပုဒ်မ ၃၇ နှင့် ၃၈ တို့ ဖြင့် အမှုဖွင့် စစ်ဆေး ခံခဲ့ရပြီးနောက် ဥပဒေအရ အရေးယူထားခြင်း ဖြစ်သည်။

အဆိုပါထိုင်းနိုင်ငံသားအား အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စု ဝန်ကြီးရုံး၊ ပြည်ထောင်စုဝန်ကြီးရုံးက ၂၀၁၈ ခုနှစ် အောက်တိုဘာလ (၃၀)ရက်နေ့တွင် ၁၉၄၇ ခုနှစ် မြန်မာနိုင်ငံ လူဝင်မှုကြီးကြပ်ရေး (လတ်တလောပြဌာန်းချက်များ) အက်ဥပဒေ ၇(၁)အရ ပြည်နှင်မိန့် ပေးထားခြင်း ဖြစ်ပြီး ၂၀၁၈ခုနှစ် နိုဝင်ဘာလ(၃)ရက်နေ့ နေ့လယ်(၁၁)နာရီ (၅၅)မိနစ်က ထိုင်းနိုင်ငံသို့ လွှဲပြောင်းပေးလိုက်ခြင်းဖြစ်သည်။

Tachileik News Agency
ဓာတ်ပုံ - ချယ်ရီထိုက်၊ ဆန်းဖြိုးထွန်း