~~~~~~~~⊰❂ unicode ❂⊱~~~~~~~~

တာချီလိတ်တွင် တစ်ရက်အတွင်း လမ်းဘေးရေမြောင်းအတွင်း ဆိုင်ကယ်ထိုးကျမှုနှင့် ဆိုင်ကယ်ကို ကားဖြင့် တိုက်မိထွက်ပြေးမှုတို့ကြောင့် လူငယ် (၂)ဦး သေဆုံး
**************
ရှမ်းပြည်နယ်(အရှေ့ပိုင်း) တာချီလိတ်မြို့တွင် ၂၀၁၈ ခုနှစ် အောက်တိုဘာလ (၃၁)ရက်နေ့ နံနက် အစောပိုင်းက လမ်းဘေးရေမြောင်းအတွင်း ဆိုင်ကယ်ထိုးကျမှုနှင့် ဆိုင်ကယ်ကို ကားဖြင့်တိုက်မိ ထွက်ပြေးမှုတို့ကြောင့် ထိုင်းနိုင်ငံသား(၁)ဦးနှင့် မြန်မာနိုင်ငံသား(၁)ဦးတို့ သေဆုံးသွားကြောင်း သိရသည်။

၂၀၁၈ ခုနှစ် အောက်တိုဘာလ (၃၁)ရက်နေ့ နံနက် (၁)နာရီဝန်းကျင်က ဝိန်းကျောက်ရပ်ကွက်၊ တော်ကော့ရွာနှင့် မယ်ခေါင်ရပ်ကွက်သွား ကွန်ကရစ်တံတားအနီးလမ်းမတွင် တော်ကော့(တွင်း)ရွာဘက်မှ ရွှေမြေသာယာဈေးဘက်သို့ အသက်(၃၁)နှစ်အရွယ် အိုက်လုံမောင်းနှင်လာသည့်ဆိုင်ကယ်သည် လမ်းဘေးရေမြောင်းအတွင်း ဆိုင်ကယ်ထိုးကျသွားပြီး ဒဏ်ရာရသွားသဖြင့် ဆေးရုံတင်ပို့စဉ် သေဆုံးသွားခြင်းဖြစ်ကြောင်း သိရသည်။

ယင်းနောက် နံနက်(၁)နာရီ မိနစ်(၅၀)အချိန်တွင် ဆန်ဆိုင်း(၄)လမ်းသွယ်အတွင်းမှ ဗိုလ်ချုပ်အောင်ဆန်း လမ်းမပေါ် ချိုးကွေ့ပြီး ပုံလို့လမ်းဘက်သို့ မောင်းနှင်လာသည့် မော်တော်ယာဉ်သည် ပုံလို့လမ်းဆုံဘက်မှ အားကစားရုံမီးပွိုင့်ဘက်သို့ လူ(၂)ဦးစီးနင်းလာသည့် ဆိုင်ကယ်အား ဝင်တိုက်မိပြီး ထွက်ပြေးမောင်းနှင်သွားခြင်းဖြစ်ကြောင်း သိရသည်။

အဆိုပါယာဉ်တိုက်မှုကြောင့် ဆိုင်ကယ်နောက်မှစီးနင်းလာသည့် အသက် (၂၅)နှစ်အရွယ် ထိုင်းနိုင်ငံသား Mr.Chanakan Saentar မှာ နေရာတွင်သေဆုံးသွားပြီး ဆိုင်ကယ်မောင်းနှင်သည့် အသက် (၂၁)နှစ်အရွယ် စိုင်းဆွမ်ဆိုင်းမှာ ဒဏ်ရာရသွားသဖြင့် တာချီလိတ်ပြည်သူ့ဆေးရုံပို့ဆောင်ကုသနေရာမှ မယ်ဆိုင်ဆေးရုံသို့ ပြောင်းရွှေ့ကုသမှုခံယူနေကြောင်း သိရသည်။

အဆိုပါအခင်းဖြစ်ရပ်များမှ ဒဏ်ရာရလူနာများနှင့် သေဆုံးသူတို့အား တာချီလိတ်နာရေးကူညီမှုအသင်းက ဆေးရုံသို့ ပို့ဆောင်ပေးခဲ့ခြင်းဖြစ်ကြောင်း သိရသည်။

ဆိုင်ကယ်ရေမြောင်းအတွင်းထိုးကျသည့် ယာဉ်တိမ်းမှောက်မှုနှင့်ပတ်သက်၍ အိုက်လုံအား တာချီလိတ်မြို့မရဲစခန်းတွင် ယာဉ်(ပ)၄၀/၂၀၁၈၊ ရာဇသတ်ကြီးပုဒ်မ ၃၀၄ က ဖြင့်အမှုဖွင့်ထားပြီး ဆိုင်ကယ်အား တိုက်မိထွက်ပြေးသွားသည့် မော်တော်ယာဉ်မောင်းကို ယာဉ်(ပ)၄၁/၁၈၊ ရာဇသတ်ကြီးပုဒ်မ ၂၇၉/၃၃၈/၃၀၄ က/၂၀၂ ဖြင့် အမှုဖွင့် စုံစမ်းနေကြောင်း သိရသည်။

Tachileik News Agency
ဓါတ်ပုံ - တာချီလိတ်နာရေးကူညီမှုအသင်း