~~~~~~~~⊰❂ unicode ❂⊱~~~~~~~~

မြန်မာ - ထိုင်းနယ်စပ် ရှမ်းပြည်နယ်(အရှေ့ပိုင်း) တာချီလိတ်မြို့မသုသာန်တွင် စွန့်ပစ်ခံထားရသည့် အဘိုးအို တစ်ဦး ၂၀၁၈ ခုနှစ် အောက်တိုဘာလ (၂၇)ရက်နေ့ အစောပိုင်းက သေဆုံးသွားသဖြင့် ပိုင်ရှင်မဲ့ အလောင်းအဖြစ် တာချီလိတ်နာရေးကူညီမှုအသင်းက သင်္ဂြိုလ်ပေးလိုက်ကြောင်း သိရသည်။

“မနေ့ညက သွေးတိုးတဲ့လူနာကို မယ်ဆိုင်ဘက်ဆေးရုံကို ပို့ပြီးအပြန်မှာ တာချီလိတ်သုဿန်မှာ အလောင်းတွေ့တယ် သတင်းရလို့သွားတဲ့ ရဲတွေနဲ့တွေ့တာ။ ကျွန်မတို့အဖွဲ့ကို အကူအညီတောင်းလို့ လိုက်သွားတာ။ ဒီမနက် အစောပိုင်းလောက်ဖြစ်တယ် ထင်တာပဲ။ ဟိုမှာ သေနေတာ တွေ့ရတယ်။ ထိုင်ခုံ အစုတ်လေးရယ်၊ ကုဒ်(Coke)ဗူးလေး တစ်ဗူးရယ်၊ ရေဗူးလေး တစ်ဗူးရယ်နဲ့ လာပစ်ခဲ့တာ။ ရဲတွေလည်း စစ်ဆေးတာတွေလုပ်ပြီး အတည်ပြုပြီးဆိုမှ အလောင်းကို စောင်လေးနဲ့ အုပ်ပေးထားခဲ့ရတယ်။ ဒီမနက်မှာ သွားသင်္ဂြိုလ်ပေးလိုက်ပါတယ်။ ကောင်းကောင်းမွန်မွန်တော့ သင်္ဂြိုလ်ပေးလိုက်ပါတယ်”ဟု တာချီလိတ်နာရေးကူညီမှုအသင်းမှ ဒေါ်ညိုထွေးက တာချီလိတ်သတင်းအေဂျင်စီသို့ ပြောသည်။

အဆိုပါ အဘိုးအိုအား လွန်ခဲ့သည့် (၃)ရက် ကတည်းက သုဿန်တွင် လာရောက်စွန့်ပစ်ထားခဲ့ခြင်းဖြစ်ပြီး အောက်တိုဘာလ (၂၆)ရက်နေ့ ညပိုင်းက သေဆုံးသွားသဖြင့် သုသာန်တွင် ခိုလှုံနေသည့် အိမ်ခြေမဲ့များက ပုန်းထွန်ရပ်ကွက်အုပ်ချုပ်ရေးမှူးထံ အကြောင်းကြား ပေးခြင်းဖြစ်ကြောင်း သိရသည်။

ယင်းကဲ့သို့ ဖြစ်ပွားခဲ့ပြီးနောက် စွန့်ပစ်ခံများအား ကူညီနိုင်ရေးအတွက်ကိုလည်း တာချီလိတ်နာရေးကူညီမှု အသင်းက ဆောင်ရွက်ပေးနိုင်ရန် စီစဉ်သွားမည်ဖြစ်ကြောင်း သိရသည်။

“အဲဒီလို မလိုချင်တော့လို့ ပစ်ထားတဲ့သူတွေကို ကောက်ပြီး ပြုစုပေးဖို့ ကြိုးစားနေပါတယ်။ အောင်မြင်အောင်တော့ ကြိုးစားမှာပါ။ သူ့ဘာသာ ဘယ်လိုဆိုးဆိုး သူဟာလည်း လူတစ်ယောက်ပါပဲ။ ဒီလိုအသက်အရွယ် ဒီလို အခြေအနေနဲ့ မပစ်သင့်ဘူးပေါ့။ ဆေးစွဲနေတဲ့လူပဲ ဖြစ်ပါစေတော့ သွားသွား လာလာ ဆိုရင်တော့ ကိုယ့်ပါ အန္တရာယ်ပြန်ပြုနိုင်တော့ မပြုစုပေးရဲဘူး။ အိပ်ရာထဲ လဲနေပါပြီ ပြုစုမယ့်သူလည်း မရှိပါဘူးဆိုရင် ကျွန်မတို့က ခေါ်ယူစောင့်ရှောက်နိုင်အောင် လုပ်သွားဖို့ ကြိုးစားနေပါတယ်”ဟု တာချီလိတ်နာရေးကူညီမှုအသင်းမှ ဒေါ်ညိုထွေးက ပြောသည်။

နယ်စပ်မြို့ဖြစ်သည့် တာချီလိတ်တွင် အိမ်ခြေမဲ့ နေထိုင်သူများလည်း ရှိနေရာ ဒေသတွင်း လူမှုကူညီရေးအသင်းများက လမ်းဘေးတွင် သေဆုံးသည့် ပိုင်ရှင်မဲ့အလောင်းများအား သင်္ဂြိုလ်ပေးရမှုများ ရှိကြောင်း သိရသည်။

Tachileik News Agency
ဓာတ်ပုံ - တာချီလိတ်နာရေးကူညီမှုအသင်း