~~~~~~~~⊰❂ unicode ❂⊱~~~~~~~~

တာချီလိတ်သို့ ၂၀၁၇ ခုနှစ်က တရားမဝင် ဝင်လာသည့် ထိုင်းနိုင်ငံသားကို ပြည်နှင်ဒဏ်ပေး
*************
ရှမ်းပြည်နယ်(အရှေ့ပိုင်း) တာချီလိတ်မြို့သို့ ၂၀၁၇ ခုနှစ်၊ သြဂုတ်လက တရားမဝင် ဝင်ရောက်လာသည့် ထိုင်းနိုင်ငံသားတစ်ဦးကို ပြည်နှင်ဒဏ်ချမှတ်လိုက်ပြီး ၂၀၁၈ ခုနှစ်၊ စက်တင်ဘာလ(၁၂)ရက်နေ့တွင် ထိုင်းနိုင်ငံမှ တာဝန်ရှိသူများထံ လွှဲပြောင်းပေးလိုက်ကြောင်း သိရသည်။

တာချီလိတ်မြို့သို့ မယ်ဆိုင်ချောင်းမှ တရားမဝင်ဖြတ်ကူးလာသည့် အဆိုပါ ထိုင်းနိုင်ငံသား Anisarus ကို ကျည်အိမ်မပါ ပစ်မရသည့် ဂက်စ်သေနတ်တစ်လက်နှင့်အတူ ၂၀၁၇ ခုနှစ်၊ သြဂုတ်လ (၂၇)ရက်နေ့က ဖမ်းဆီးရမိခြင်းဖြစ်ပြီး ၎င်းသည် ထိုင်းနိုင်ငံတွင် တက်တူးထိုးသည့်လုပ်ငန်း လုပ်ကိုင်သူဖြစ်ကြောင်း တာချီလိတ်မြို့သို့ လည်ပတ်ရန်ဝင်ရောက်လာခြင်းဖြစ်ကြောင်း ထွက်ဆိုသည်ဟု သိရသည်။

အဆိုပါ ထိုင်းနိုင်ငံသားသည် အခြားပြစ်မှုများ ကျူးလွန်ထားခြင်းမရှိသဖြင့် မြန်မာနိုင်ငံ လူဝင်မှုကြီးကြပ်ရေး အက်ဥပဒေ ပုဒ်မအရ အရေးယူမည့်အစား ပြည်နှင်ဒဏ်ပေးရန် တင်ပြဆောင်ရွက်ခဲ့ခြင်းဖြစ်ကြောင်း သိရသည်။

မြန်မာ - ထိုင်းနယ်စပ် တာချီလိတ်မြို့သို့ တရားမဝင် ဝင်ရောက်လာသည့် ထိုင်းနိုင်ငံသားများကို ဖမ်းဆီးရမိပါက အခြားပြစ်မှုများ ကျူးလွန်ခြင်းမရှိသူများကို ပြည်နှင်မိန့်ဖြင့် ထိုင်းနိုင်ငံ တာဝန်ရှိသူများထံ လွှဲပြောင်းပေးပြီး ထိုင်းနိုင်ငံတွင်း တရားမဝင် ဝင်ရောက်ခြင်း၊ နယ်မြေကျော်လွန်သွားလာခြင်း၊ သက်တမ်းကျော်လွန်နေထိုင်ခြင်းတို့ကြောင့်  ဖမ်းဆီးရမိသည့် မြန်မာနိုင်ငံသားများကိုလည်း ထိုင်းတာဝန်ရှိသူများက မြန်မာနိုင်ငံဘက်ခြမ်း တာချီလိတ်မြို့ရှိ သက်ဆိုင်ရာ တာဝန်ရှိသူများထံ လွှဲပြောင်းပေးလေ့ရှိသည်။

ယင်းကဲ့သို့ နှစ်နိုင်ငံချစ်ကြည်ရေးအရ လွှဲပြောင်းခံရသည့် နှစ်နိုင်ငံမှ နိုင်ငံသားများအား အမည်ပျက်စာရင်းထည့်သွင်းခြင်းမရှိဘဲ တရားဝင် နယ်စပ်ဖြတ်သန်းခွင့်ဖြင့် ပြန်လည်ဝင်ရောက်နိုင်ကြောင်း သိရသည်။

ဓါတ်ပုံ -ရဲတပ်ဖွဲ့