~~~~~~~~⊰❂ unicode ❂⊱~~~~~~~~

မြန်မာ - ထိုင်းနယ်စပ်ဒေသ၊ ရှမ်းပြည်နယ်အရှေ့ပိုင်း၊ တာချီလိတ်မြို့နယ် အတွင်း၌ တပ်မတော်နှင့် မြန်မာနိုင်ငံရဲတပ်ဖွဲ့တို့ ပါဝင်သည့် ပူးပေါင်းအဖွဲ့က စိတ်ကြွဆေးပြား (၇၈.၂)သိန်းနှင့် မူးယစ်ဆေး သယ်ဆောင်လာသူများအနက်တစ်ဦးကို စိုးရိမ်ရဒဏ်ရာဖြင့် ပစ်ခတ်ဖမ်းဆီးရမိထားကြောင်း သိရသည်။

တာချီလိတ်မှ သက်ဆိုင်ရာရဲတပ်ဖွဲ့များပါဝင်သည့်ပူးပေါင်းအဖွဲ့က မိုင်းဟဲကျေးရွာအုပ်စု၊ ယန်းခေါင်ကျေးရွာ အနီး လွယ်စီတုံ - မိုင်းဟဲလမ်းပေါ်တွင် ၂၀၁၈ ခုနှစ်၊ သြဂုတ်လ (၁၀)ရက်နေ့က ပိတ်ဆို့ရှာဖွေနေစဉ် ည(၉)နာရီ (၂၀) မိနစ်ခန့်၌ စန်းလုရွာဘက်မှ တာချီလိတ်ဘက်သို့ မောင်းနှင် လာသည့် မော်တော်ယာဉ်(၂)စီးအား စစ်ဆေးရန် တားဆီးစဉ် နောက်လှည့်မောင်းနှင်ထွက်ပြေးသွားသဖြင့် ပစ်ခတ်ဖမ်းဆီးခဲ့ရာ ကားပေါ်မှအမျိုးသားတစ်ဦး နောက်စေ့ဖောက်ဝင်ဒဏ်ရာဖြင့် ပြုတ်ကျကျန်ခဲ့ခြင်း ဖြစ်ကြောင်း သိရသည်။

“ယန်းခေါင်မှာ ပစ်လိုက်တာ ဟိုဘက်ကတစ်ယောက်ထိတယ်။ ဆေးရုံတင်ထားတယ်။ စိုးရိမ်ရဒဏ်ရာနဲ့။ တစ်ယောက်ပြုတ်ကျ ကျန်ခဲ့တာ။ ပြီးမှစန်းလုမှာ မိတာ။ လူတွေတော့ မရလိုက်ဘူး။ ဖော်ကျူနာထဲက ထိုင်ခုံမှာတော့ သွေးတွေပေနေတယ်။ လူတော့မတွေ့ရဘူး။ ယမ်းခေါင်မှာ သူတို့ဘက်က စပစ်လို့ ပြန်ပစ်တာ တစ်ယောက်ထိတယ်။ ပူးပေါင်းအဖွဲ့က နောက်မှရောက်တာဗျ။ စဖြစ်ကတည်းက တပ်နဲ့၊ ဖမ်းဆီးမိတာလည်း တပ်နဲ့ပဲဗျ”ဟု အဆိုပါ ဖမ်းဆီးမှုတွင် ပါဝင်သည့် တပ်ဖွဲ့ဝင် တစ်ဦးက တာချီလိတ်သတင်းအေဂျင်စီသို့ ပြောသည်။

ပြုတ်ကျကျန်ခဲ့သည့် အမျိုးသားနှင့်အတူ စိတ်ကြွဆေးပြား (၁၀,ဝဝဝ)ပြားပါ အထုပ်(၂)ထုပ် စုစုပေါင်း စိတ်ကြွဆေးပြား (၂၀,ဝဝဝ)ကိုလည်း တွေ့ရှိရကြောင်း သိရသည်။

အဆိုပါ ထွက်ပြေးလွတ်မြောက်သွားသော မော်တော်ယာဉ်(၂)စီးအား ပိတ်ဆို့ ဖမ်းဆီးနိုင်ရေးအတွက် စစ်ဗျူဟာအခြေချ(တခလ)မှ စစ်ဗျူဟာမှူးဗိုလ်မှူးကြီးအေးမင်းဦး၊ ခရိုင်ရဲတပ်ဖွဲ့မှူး ဒုရဲမှူးကြီး ပေါ်ထွန်းတို့ထံ အကြောင်းကြား၍ မူးယစ်တပ်ဖွဲ့စု(၃၀)စုမှူး၊ယာယီရဲမှူး ဦးစီးပူးပေါင်းအဖွဲ့တို့က စန်းလုကျေးရွာဘက်သို့ လိုက်လံ ဖမ်းဆီးခဲ့ခြင်းဖြစ်ကြောင်း သိရသည်။

စန်းလု(အောက်ရွာ)အနီး နယ်မြေလုံခြုံရေး ဆောင်ရွက်နေသည့် နယ်မြေခံတပ်နှင့် စန်းလုကျေးရွာ ပြည်သူ့စစ်အဖွဲ့မှ အဆိုပါ ထွက်ပြေးလာသည့် မော်တော်ယာဉ်(၂)စီးကိုတွေ့၍ ရပ်တန့်ခိုင်းရန် ကြိုးစားစဉ် ထွက်ပြေး လွတ်မြောက်သွားပြီး ထွက်ပြေးယာဉ်(၂)စီးနောက်သို့ တပ်မတော် ပူးပေါင်းအဖွဲ့က လိုက်လံဖမ်းဆီးရာ ည(၁၀)နာရီ ဝန်းကျင်တွင် စန်းလု(အောက်ရွာ) နှင့် စန်းလု(အထက်ရွာ)အကြား ဂျောပရွာသွားလမ်း ယာဘက်လျို အတွင်းသို့ ယာဉ်အမှတ် SHN - 2 J / 2018 Fortuner အနက်ရောင်ယာဉ်မှာ တိမ်းမှောက်သွားခဲ့ပြီး ယာဉ်ပေါ်တွင် ပါသူများမှာ တောအတွင်းသို့ ထွက်ပြေးလွတ်မြောက်သွားကြောင်း သိရသည်။

အဆိုပါ အနက်ရောင်ယာဉ်ပေါ်တွင် ဆာလာအိတ်(၁)အိတ်လျှင် WY စာတမ်းပါစိတ်ကြွဆေးပြား (၁)သိန်းစီပါ ဆာလာအိတ် (၂၂)အိတ်၊ ဆေးပြား (၂၂)သိန်းအား တွေ့ရှိသိမ်းဆည်းရမိခဲ့ပြီး ကျန်ထွက်ပြေး မော်တော်ယာဉ်အား လိုက်လံဖမ်းဆီးရာ သြဂုတ်လ (၁၁)ရက်နေ့ နံနက် (၁)နာရီ (၂၀)မိနစ်ခန့်တွင် စန်းလု(အောက်ရွာ) နှင့် ရင်ကွဲတောင်အကြား လျိုအတွင်း SHN 6L/ 3681 Revo အဖြူရောင်ယာဉ်အား တွေ့ရပြီး ယာဉ်ပေါ်ပါသူများမှာ တောတွင်းသို့ ထွက်ပြေးသွားခဲ့ကြောင်း သိရသည်။

ဆက်လက်၍ အဖြူရောင်ယာဉ်ပေါ်တွင် (၁)အိတ်လျှင် ဆေးပြား(၁)သိန်း စီပါ ဆာလာအိတ်(၅၆)အိတ်၊ စုစုပေါင်း WY စာတမ်းပါ စိတ်ကြွဆေးပြား (၅၆)သိန်းအား တွေ့ရှိသိမ်းဆည်းရမိခဲ့ကြောင်း သိရသည်။

ဖမ်းဆီးရမိသည့် မော်တော်ယာဉ်(၂)စီးမှ စိတ်ကြွဆေးပြား (၇၈.၂)သိန်းကို လက်ရှိအချိန်ထိ စစ်ဆေးတွေ့ရှိထားပြီး သက်ဆိုင်ရာ တပ်ဖွဲ့များက ဆက်လက်စစ်ဆေးမှုများ လုပ်ဆောင်နေဆဲဖြစ်ကြောင်း သိရသည်။

သတင်း - ငြိမ်းချမ်း(ပြည်)၊ Tachileik News Agency
ဓာတ်ပုံ - ရဲတပ်ဖွဲ့