~~~~~~~~⊰❂ unicode ❂⊱~~~~~~~~

လုပ်ငန်းတင်ဒါလျှောက်ထားသည့်ကုမ္ပဏီများကို QC မှတ်တမ်းများဖြင့် အကဲဖြတ်မည်
************
မကွေးတိုင်းဒေသကြီး ဆောက်လုပ်ရေးနှင့် ပို့ဆောင်ဆက်သွယ်ရေးဝန်ကြီးဌာနတွင် လုပ်ငန်းတင်ဒါ လျှောက်ထားသည့် ကုမ္ပဏီများအား QC မှတ်တမ်းအပေါ်အခြေခံ၍ အကဲဖြတ်မှုများ ဆောင်ရွက်သွား မည်ဖြစ်ကြောင်း တိုင်းဒေသကြီး ဆောက်လုပ်ရေးနှင့် ပို့ဆောင်ဆက်သွယ်ရေးဝန်ကြီးဌာနထံမှ သိရသည်။

“လုပ်ငန်းတင်ဒါအောင်မြင်ပြီး လုပ်ကိုင်ခွင့်ရထားတဲ့ ကုမ္ပဏီတွေရဲ့ လုပ်ငန်းဆိုင်ရာအရည်အသွေး အကဲဖြတ်မှတ်တမ်း (QC record) တွေကို ကျွန်တော်တို့လက်ထဲမှာ စနစ်တကျသိမ်းဆည်းထားပါတယ်။ နှစ်စဉ်တင်ဒါပြိုင်ပွဲတွေခေါ်တဲ့အခါမှာ သူတို့တင်တဲ့ profile ဘယ်လိုပဲကောင်းနေပါစေ QC မှတ်တမ်းကောင်း မကောင်း စိစစ်ပြီးမှ အကဲဖြတ်မှုတွေလုပ်ဆောင်သွားတော့မှာပါ”ဟု မကွေးတိုင်းဒေသကြီး ဆောက်လုပ် ရေးနှင့် ပို့ဆောင်ဆက်သွယ်ရေးဝန်ကြီး ဦးတင်နွယ်ဦးက တာချီလိတ်သတင်းအေဂျင်စီသို့ ပြောသည်။

တာဝန်ခံဖြစ်သည့် လမ်းဦးစီးဌာန၏ ဒုတိယညွှန်ကြားရေးမှူးက အဆောက်အဦ၊ လုပ်ငန်း၊ နေရာ၊ ကုမ္ပဏီနှင့် စစ်ဆေးသည့်ရက်စွဲ အစရှိသည့် အချက်အလက်များအား ဝန်ကြီးထံတင်ပြရပြီး ဆောက်လုပ်ရေးလုပ်ငန်းစဉ် အသေးစိတ်များမှစ၍ သက်မှတ်ချက်များနှင့်အညီ လိုက်နာမှုရှိ/မရှိ အရည်အသွေး ပြည့်မီခြင်းရှိ/မရှိတို့ကို မှတ်တမ်းတင်ထားရကြောင်း သိရသည်။

“တင်ဒါခေါ်ပြီဆိုရင် ကုမ္ပဏီတွေရဲ့ profile ကို စစ်ရမှာပေမဲ့ အဲဒီတစ်ခုတည်းနဲ့ မပြည့်စုံတော့ဘူး။ စာရွက်ထဲမှာတော့ profile ကို လှအောင်ရေးကြမှာပဲ။ ဒါကြောင့် QC record တွေကို ကိုင်ထားပြီး သေ ချာစိစစ်သွားတော့မှာပါ” ဟု ဝန်ကြီးက ပြောသည်။

QC မှတ်တမ်းကို အခြေခံ၍ တင်ဒါရွေးချယ်မည့်စနစ်ဖြစ်ရာ လုပ်ငန်းလုပ်ကိုင်လိုသည့် ကုမ္ပဏီများအနေဖြင့် လုပ်ငန်းများအား အရည်အသွေး ပြည့်မီစွာ လုပ်ဆောင်ထားသည့်မှတ်တမ်းများရှိရန် လိုအပ်ကြောင်း သိရသည်။

သတင်း #ဖီးနစ်