~~~~~~~~⊰❂ unicode ❂⊱~~~~~~~~

ဧပြီလ(၅)ရက်နေ့တွင် ပြုလုပ်သည့် ဒုတိယအကြိမ် မကွေးတိုင်းဒေသကြီးလွှတ်တော် အဌမ ပုံမှန် အစည်းအဝေး၏ စတုတ္ထနေ့တွင် မကွေးတိုင်းဒေသကြီးအစိုးရအဖွဲ့၌ လစ်လပ်လျက်ရှိသော ဝန်ကြီး (၂)ဦး၏ နေရာအတွက် ဖြည့်စွက် ခန့်ထားနိုင်ရန် ဝန်ကြီးချုပ်က ဒုတိယအကြိမ်မြောက် တင်သွင်းခဲ့သည့် ဝန်ကြီးလောင်း (၂)ဦးအနက် တစ်ဦးကို လွှတ်တော်က သဘောတူခဲ့ပြီး ကျန်တစ်ဦး၏ အဆိုပြုထားရှိမှုကို ဆိုင်းငံ့လိုက်ကြောင်း ကြေညာလိုက်သည်။

ဝန်ကြီးချုပ်က အမည်စာရင်းတင်သွင်းခဲ့သူ (၂)ဦးအနက် လွှတ်တော်ကိုယ်စားလှယ် မဟုတ်သူ အငြိမ်းစား ခရိုင်ပညာရေးမှူး၊ ဒုတိယညွှန်ကြားရေးမှူး အသက်(၆၂)နှစ်အရွယ်ရှိ ဦးမြင့်ဆွေ အား လွှတ်တော်၏ သဘောတူညီချက်ကို ရယူရာ လွှတ်တော်က သဘောတူခဲ့ပြီး လယ်ယာစိုက်ပျိုးရေးနှင့်ဆည်မြောင်း ဝန်ကြီးဌာနမှ အငြိမ်းစား ညွှန်ကြားရေးမှူး ဦးခင်မောင်ထွန်းကို ခန့်ထားရန် အကြောင်းအကျိုး အတည်ပြုချက် လိုအပ်နေသည့် အတွက် ဆိုင်းငံ့လိုက်ခြင်းဖြစ်ကြောင်း သိရသည်။

"လက်ရှိအခြေအနေမှာ လွှတ်တော်က ကန့်ကွက်မှု မရှိပေမယ့် ဝန်ကြီးချုပ်က ဆိုင်းငံ့လိုက်တာဖြစ် ပါတယ်။ ဘာကြောင့် ဆိုင်းငံ့လိုက်ရတယ်ဆိုတာတော့ မသိရသေးပါဘူး"ဟု မကွေးတိုင်းဒေသကြီးလွှတ်တော် ဥက္ကဌ ဦးတာက တာချီလိတ်သတင်းအေဂျင်စီသို့ ပြောကြားသည်။

မကွေးတိုင်းဒေသကြီးအစိုးရအဖွဲ့ဝင် ဝန်ကြီး (၂)ဦးအား၎င်းတို့၏ သဘောဆန္ဒအရ နှုတ်ထွက်ခွင့် ပြုရန်တင်ပြခဲ့မှုအပေါ် နိုင်ငံတော်သမ္မတက နှုတ်ထွက်ခွင့်ပြုခဲ့သဖြင့် တိုင်းဒေသကြီး ဝန်ကြီးရာထူး (၂)နေရာ လစ်လပ်လျက်ရှိရာ အဆိုပါ ရာထူးနေရာများကို ဖြည့်စွက်ခန့်ထားရန်အတွက် ပြည်ထောင်စု သမ္မတ မြန်မာနိုင်ငံတော် ဖွဲ့စည်းပုံအခြေခံဥပဒေပုဒ်မ ၁၆၁၊ ပုဒ်မခွဲ(က)ပါ အမည်စာရင်း သတ်မှတ်ချက်များနှင့် ပြည့်စုံသည့် လွှတ်တော်ကိုယ်စားလှယ် မဟုတ်သူ အသက်(၆၂)နှစ်အရွယ်များ ဖြစ်ကြသော ဦးမြင့်ဆွေနှင့် ဦးခင်မောင်ထွန်း တို့ကို တိုင်းဒေသကြီး(သို့)ပြည်နယ်အစိုးရအဖွဲ့ ဥပဒေ ပုဒ်မ ၈ နှင့်အညီ တာဝန်ပေးအပ်လိုကြောင်းနှင့် မကွေးတိုင်းဒေသကြီးလွှတ်တော်မှ သဘောတူညီချက်ပေးပါရန် ဝန်ကြီးချုပ်က လွှတ်တော်သို့ အဆိုပြု တင်သွင်းခဲ့ခြင်း ဖြစ်သည်။

မကွေးတိုင်းဒေသကြီးအစိုးရအဖွဲ့တွင် လစ်လပ်လျက်ရှိသော အလုပ်သမား၊ လူဝင်မှုကြီးကြပ်ရေး နှင့်ပြည်သူ့အင်အားဝန်ကြီး နှင့် စိုက်ပျိုးမွေးမြူရေးနှင့် ဆည်မြောင်းဝန်ကြီး နေရာ အမည်စာရင်းကို ဖေ ဖော်ဝါရီ (၁၄)ရက်နေ့တွင် ပြုလုပ်သည့် ဒုတိယအကြိမ် မကွေးတိုင်းဒေသကြီးလွှတ်တော် အရေးပေါ် အစည်းအဝေး ၁/၂၀၁၈ ပထမနေ့တွင် ပထမအကြိမ် အဆိုပြုတင်သွင်းခဲ့သည့် အပေါ် လွှတ်တော်ကိုယ် စားလှယ် (၁၇)ဦးက ကန့်ကွက်ခဲ့သဖြင့် ဝန်ကြီးချုပ်က၎င်း တင်သွင်းသည့် အမည်စာရင်းကို ပြန်လည်ရုပ် သိမ်းခဲ့ရပြီး ယခု ဒုတိယအကြိမ်မြောက် ထပ်မံ အဆိုပြုတင်သွင်းသည့် ဝန်ကြီးလောင်း(၂) ဦးအနက် ဦးခင်မောင်ထွန်းအား လွှတ်တော်မှ ကန့်ကွက်ခြင်း မရှိသော်လည်း ခန့်ထားရန် အကြောင်းအကျိုး အတည် ပြုချက်လိုအပ်နေသည့် အတွက် ဝန်ကြီးချုပ်က၎င်း၏ အဆိုပြုထားရှိမှုအား ဆိုင်းငံ့လိုက်ခြင်းဖြစ်ကြောင်း သိရသည်။

သတင်း - #ဖီးနစ်
ဓာတ်ပုံ - #မကွေးတိုင်းဒေသကြီးလွှတ်တော်