~~~~~~~~⊰❂ unicode ❂⊱~~~~~~~~

မြန်မာ - ထိုင်း နယ်စပ် တာချီလိတ်မြို့တွင် ကျပ် - ဘတ် ငွေလဲလှယ်ရာ၌ ဇူလိုင်လ အတွင်း မြန်မာကျပ်ငွေတန်ဖိုး ဆက်လက် ကျဆင်းနေလျက်ရှိသည့် အတွက် မြန်မာကျပ်ငွဖြေင့် လစာရပြီး ငွေကြေးလဲလှယ် သုံးစွဲနေရသူများ အတွက် အခက်တွေ့သည့် ကာလဖြစ်နေကြောင်း သိရသည်။

“အခုလို ကျပ်ငွေတွေ ဈေးကျနေတော့ ဒီမှာ တာဝန်ကျတဲ့ အစိုးရဝန်ထမ်းတွေ၊ ဘဏ်ဝန်ထမ်းတွေ၊ ကျပ်ငွေနဲ့ လစာရတဲ့ ဝန်ထမ်းတွေအတွက် အလွန် နစ်နာပါတယ်။ တာချီလိတ်မှာက ဘတ်ငွေကို အဓိက သုံးစွဲတာဆိုတော့ ကျပ်လဲတော့လဲ ဈေးကကျ၊ မလဲဘဲ ဈေးဆိုင်တစ်ခုခုမှာ ကျပ်နဲ့ဝယ်ရင်လည်း ဈေးကနှိမ်ခံရ ဆိုတော့ နှစ်ခါနစ်နာတာပေါ့။ မြဝတီ ကော့သောင်းဘက်မှာကျတော့ ကျပ်ကိုသုံးတာဆိုတော့ ဘာမှမဖြစ်ဘူး။ ဒါတောင် အဲ့ဒီဖက်နဲ့ ဒီဖက်က ကျပ် - ဘတ် ငွေလဲရင် (၅)ဘတ်တောင်ပိုသေးတယ်။”ဟု တာချီလိတ်မြို့တွင် အလုပ်လုပ်ကိုင်သူ အမျိုးသမီးတစ်ဦးက ပြောသည်။

တာချီလိတ်မြို့တွင် ဇူလိုင်လ(၂၆)ရက်နေ့ ငွေလဲဈေးနှုန်းမှာ ကျပ်တစ်သိန်းလျှင် ထိုင်းငွေ(၂၄၇၅)ဘတ် ရှိပြီး ဇူလိုင် လ ပထမပတ်မှ တတိယပတ်အတွင်း ကျပ်တစ်သိန်းလျှင် ထိုင်းငွေ (၂၅၀၀)ဘတ်မှ (၂၄၇၀)ဘတ်အထိ သိသိသာသာ ကျဆင်းလာကြောင်း သိရသည်။

“ကျပ်ငွေက အရင်လတုန်းကတော့ ၂၅၁၀ ဘတ် ၂၅၂၀ ဘတ် နဲ့ တည်ငြိမ်နေသေးတယ်။ အခုလမှာ နည်းနည်းနဲ့ ကျလာပြီး ဈေးမငြိမ်ဘူး။ တတိယအပတ်မှာ ၂၄၇၀လောက်ထိ ကျလာတယ်။ ဈေးမတည်ငြိမ်တော့ ရောင်းအား ဝယ်အားလည်း မကောင်းဘူး။”ဟု ကျပ် - ဘတ် ငွေလဲလုပ်ကိုင်သူ တစ်ဦးက တာချီလိတ်သတင်းအေဂျင်စီသို့ ပြောသည်။

တာချီလိတ်မြို့တွင် ယနေ့ ဇူလိုင်လ(၂၆)ရက်နေ့တွင် ကျပ်တစ်သိန်းလျှင် ထိုင်းငွေ(၂၄၆၅)ဘတ် ရရှိသော်လည်း မြဝတီ ကော့သောင်းဘက်တွင် ယနေ့ ဇူလိုင်လ(၂၆)ရက်နေ့တွင် ကျပ်တစ်သိန်းလျှင် ထိုင်းငွေ(၂၄၇၀)ဘတ်ရရှိကြောင်း နှင့် ငွေလဲလှယ်ရာတွင်လည်း အနည်းငယ်ကွာဟကြောင်း သိရသည်။

သတင်း - #ဇောင်းညီ