သင်္ကြန်ကာလ ထိုင်းနိုင်ငံမှ ဗီဇာကြေးကင်းလွတ်ခွင့်ထုတ်ပြန်ချက်အား နယ်စပ်မှပြန်မည့်သူများ ဆောင်ထားကြရန် တိုက်တွန်း
************
မြန်မာ-ထိုင်းနယ်စပ်ဝင်ပေါက်များမှ သွားလာနေသည့် မြန်မာနိုင်ငံသားများအနေဖြင့် သင်္ကြန်ကာလအတွင်း ထိုင်းနိုင်ငံမှ ဗီဇာကြေးကင်းလွတ်ခွင့်ပြုထားကြောင်း ကြေညာချက်အား ဆောင်ထားကြရန် ထိုင်းနိုင်ငံရောက် မြန်မာနိုင်ငံသားများအား ကူညီပေးနေသည့် AAC မဟာမိတ်အဖွဲ့မှ ကိုရဲမင်းက တိုက်တွန်းထားသည်။

သင်္ကြန်ကာလနေရပ်ပြန်မည့် မြန်မာနိုင်ငံသားများအနေဖြင့် ပုံမှန်ပေးနေရသည့် ဗီဇာဆိုင်ရာ အထွေထွေ ကုန်ကျစရိတ်ကင်းလွတ်ခွင့်ကို ဧပြီလ (၅)ရက်နေ့မှ ဧပြီလ (၃၀) ရက်နေ့အထိ ခွင့်ပြုကြောင်း မတ်လ (၁၄)ရက်နေ့တွင် ထိုင်းနိုင်ငံ လူဝင်မှုကြီးကြပ်ရေးဌာနမှ ထုတ်ပြန်ထားခြင်းဖြစ်သဖြင့် နယ်စပ်ဝင်ပေါက် အသီးသီးမှ နေရပ်ပြန်မည့် မြန်မာနိုင်ငံသားများအား ငွေကြေးတောင်းခံခြင်းများနှင့်ကြုံလာပါက ဖြေရှင်းနိုင်ရန် ယင်းကဲ့သို့ အသိပေးထားခြင်းဖြစ်ကြောင်း သိရသည်။

 “ဘယ်မှာဖြစ်ဖြစ်ပါ အပေါ်က ဥပဒေထုတ်ပေမဲ့ အောက်ခြေဝန်ထမ်းတွေက လစ်ရင်လစ်သလို စားပေါက်ရှာကြမှာပါပဲ။ အဓိကကတော့ ကိုယ်နိုင်ငံသားတွေက လတ်တလော ထုတ်ပြန်ထားတဲ့ ဥပဒေအကြောင်းအရာ၊ ခံစားခွင့် စသည်တို့ကို လေ့လာသိရှိနားလည်ထားကြဖို့ လိုနေကြတာပါ”ဟု နယ်စပ်မြို့ တာချီလိတ်အခြေစိုက် မယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးကော်မတီ CNCMC မယ်ဆိုင်မြို့တာဝန်ခံ ဦးထွန်းက ဆိုသည်။

ထိုင်းနိုင်ငံမှ ဗီဇာဆိုင်ရာအထွေထွေကုန်ကျစရိတ် ကင်းလွတ်ခွင့်ပြုလိုက်ခြင်းမှာ ပထမဆုံးအကြိမ်ဖြစ်ပြီး နယ်စပ်ဝင်ပေါက်များမှ တရားမဝင် ဝင်ရောက်မှု လျော့သွားနိုင်သည်ဟု ထိုင်းမြန်မာနယ်စပ်မှ လူမှုကူညီရေးအဖွဲ့များက ခန့်မှန်းထားသည်။

“ကုန်းလမ်းနယ်စပ်ဒေသ အဝင်တွေအနေနဲ့က (reentry) နယ်စပ်ကနေပြန်အဝင်အတွက် ထိုင်းလဝကရုံးမှာ ဘတ် (၁၀၀၀)၊ မြန်မာ - ထိုင်းနယ်စပ်တံတား ဖြတ်ရင် ထိုင်းဘက်က (၂၀၀) ဘတ်၊  မြန်မာဘက်က (၃၀၀) ဘတ်ပါ။ အရင်နှစ်တွေက အများအားဖြင့် အဲဒီလိုမတတ်နိုင်ကြတော့ ရေချောင်းကနေ တရားမဝင်ကူးကြတော့ ပြသနာတွေများတယ်”ဟု CNCMC မယ်ဆိုင်မြို့တာဝန်ခံ ဦးထွန်းက ပြောသည်။

အဆိုပါ ထုတ်ပြန်ချက်အရ ထိုင်းနိုင်ငံရောက် မြန်မာလုပ်သား ပန်းရောင်ဘတ်ကဒ် ကိုင်ဆောင်သူများအနေဖြင့် မိမိတို့သက်ဆိုင်ရာနယ်မြေ အလုပ်သမားရုံးမှ ထောက်ခံစာထုတ်ယူခြင်းနှင့် ပတ်စပို့စ်စာအုပ်ကိုင်ဆောင်သူများ အနေဖြင့် တံဆိပ်တုံးထုရန် လိုအပ်ကြောင်း သိရသော်လည်း ပုံမှန်အတိုင်း ပေးဆောင်နေရသည့် ဗီဇာဆိုင်ရာအထွေထွေကုန်ကျစရိတ်အား ကင်းလွတ်ခွင့် ပြုထားခြင်းဖြစ်ကြောင်း သိရသည်။

သတင်း #အင်မိုင်ခ
ဓါတ်ပုံ #Ye Min (AAC)