ရှမ်းပြည်နယ်မြောက်ပိုင်း လားရှိုးမြို့ ရပ်ကွက် (၁၂) တွင် ဖေဖော်ဝါရီလ (၁၇) ရက် နေ့လယ်ပိုင်းက မီးအားမြှင့်စက် အပူလွန်ကဲရာမှ မီးလောင်မှုဖြစ်ပွားသဖြင့် နေအိမ်တစ်လုံးနှင့် ကားတစ်စီး မီးလောင်ကျွမ်းသွားကြောင်း သိရသည်။

“မီးလောင်တာ ဟုတ်ပါတယ်။ အခု ( ပ ) နံပါတ် ၂၄/၂၀၁၇ ရာဇသတ်ကြီးပုဒ်မ ( ၂၈၅ ) နဲ့ အမှုဖွင့်ထားပါတယ်။ အာမခံရထားတယ်လို့သိရပါတယ်”ဟု လားရှိုးမြို့ နယ်မြေရဲစခန်းမှ တာဝန်မှူးရဲအရာရှိက ပြောသည်။

မီးလောင်မှုမှာ နေ့လည် (၁၁) နာရီခန့်တွင် စတင်ဖြစ်ပွားရာ အမှတ်(၁၂)ရပ်ကွက် မီးသတ်ယာဉ်၊ ဗဟိုမီးသတ် ယာဉ်နှင့် မြို့ပေါ်ရပ်ကွက်များမှ မီးသတ်ယာဉ်များ သွားရောက် မီးငြှိမ်းသတ်ခဲ့ရာ နေ့လယ် (၁၁)နာရီ (၅၀)မိနစ်ခန့်တွင် မီးထိန်းနိုင်ခဲ့ကြောင်း သိရသည်။

“မီးလောင်တာက အရမ်းမြန်တယ်။ ကားနဲ့အိမ်နဲ့ နီးနေတော့ ကားကိုမီးကူးသွားတာ မီးအားမြှင့်စက် အပူလွန်ပြီး မီးစလောင်တာလို့ပြောတယ်။ လူတွေတော့ အထိအခိုက်မရှိဘူး။ အိမ်ကတော့ အကုန်နီးပါးပဲ။ ကားကအတွင်းပိုင်းတွေ တော်တော်လောင်သွားတယ်”ဟု မီးလောင်ရာသို့ သွားရောက်ခဲ့သည့် ကိုတိုးမြင့်က တာချီလိတ်သတင်းအေဂျင်စီကို ပြောသည်။

ပတ်ဝန်းကျင်နေအိမ်များသို့ ကူးစက်လောင်ကျွမ်းခြင်းမရှိဘဲ ငြှိမ်းသတ်နိုင်ခဲ့ကြောင်း သိရသည်။

သတင်း - #နဖြေိုးမြင့်