ပြီးခဲ့သော ရက်များအတွင်းက မိုးများရွာသွန်းမှုကြောင့် တာချီလိတ်မြို့နယ် အပါအ၀င် ထိုင်းနိုင်ငံ မယ်ဆိုင်မြို့များ၌ ရေလွှမ်းမိုးမှုများနှင့် မိုးဒဏ်လေဒဏ်များကြောင့် သစ်ကိုင်းများ သစ်ပင်များ၏ ကျိုးကျမှုဒဏ်ကြောင့် ဓါတ်တိုင်များ၊ ဓါတ်ကြိုးများပေါ်ရှိ သစ်ကိုင်းများအား ခုတ်ထွင်ရှင်းလင်းရန်အတွက် တာချီလိတ်မြို့နယ်တွင် ယနေ့ နေ့လည်ပိုင်းက ခေတ္တမီးပျက်တောက်သွားခဲ့ပါသည်။
မြန်မာနိုင်ငံ တာချီလိတ်မြို့ဘက်သို့ လျှပ်စစ်မီးပေးထားသော မယ်ဆိုင်မြို့မှ ထရန်စဖော်မာ တစ်လုံးမှာ အနည်းငယ် ချို့ယွင်းနေသည့်အတွက် နက်ဖြန် (၁၇.၈.၂၀၁၃)မှာ နံနက် ၈ နာရီမှ ညနေ ၄ နာရီအချိန်ထိ မီးအားအနည်းအငယ် ကျမည်ဖြစ်ကြောင်း သိရသည်။
" မယ်ဆိုင်ဘက်က ထရန်စဖော်မာတစ်လုံး ပြင်မှာဆိုတော့ တာချီလိတ်ကို မီးမပျက်သွားစေဖို့ ကျင်းဆန်ဘက်က မီးခဏ ပေးသုံးထားမှာဖြစ်တဲ့အတွက် မီးပျက်မှာတော့ မဟုတ်ပါဘူး၊ မီးအားနည်းမှာပါ၊ မနက် ၈ နာရီကနေ ညနေ ၄ နာရီအထိပဲ၊ မီးအားနည်းမယ်ဆိုတော့ အဲယားကွန်းတို့၊ မီးအားဆွဲစေမဲ့ လျှပ်စစ်ပစ္စည်းတွေ သုံးလို့ မရနိုင်ပါဘူး"ဟု မီးလင်းရေးကော်မတီမှ လူမှုဆက်ဆံရေး တာဝန်ခံ ဦးစိုင်းခမ်းမွန်းက တာချီလိတ်အွန်လိုင်းသို့ ပြောကြားလာသည်။
"မီးလုံးဝ ပျက်သွားမှာမဟုတ်ပေမဲ့ မီးအားအနည်းအငယ် ကျမှာဆိုတော့ မီးအားဆွဲစေမဲ့ လျှပ်စစ်ပစ္စည်းတွေ သုံးစွဲရင် သတိထားစေချင်ပါတယ်၊ ညနေ ၄နာရီ ကျော်သွားရင်တော့ ပုံမှန်အတိုင်း ပြန်သုံးစွဲလို့ရသွားမှာပါ"ဟု မြို့နယ်အုပ်ချူပ်ရေးမှူး ဦးရဲထူးက တာချီလိတ်အွန်လိုင်းသို့ အသိပေးပြောကြားလာသည်။
