ရှမ်းပြည်နယ်(အရှေ့ပိုင်း)၊ တာချီလိတ်ခရိုင်၊ မိုင်းဖုန်းဒေသရှိ မိုင်းဖုန်းဆရာတော် ဘဒ္ဒန္တဥာဏသံဝရသည် ထိုင်းနိုင်ငံတွင် သီတင်းသုံးနေထိုင်ပြီး ယခုအခါမှာ နိုင်ငံတော်မှ ပြန်လည်ပင့်ဆောင်ခွင့် ရပြီဖြစ်တာကြောင့် ဆရာတော်အား ပြန်လည်ပင့်ဆောင်ရေးနှင့် ပြန်လည်မပင့်ဆောင်မီ ဆရာတော်၏ ကျောင်းဆောင်အား ပြန်လည်မွမ်းမံမှုများ ပြုလုပ်နိုင်ရေးအတွက် ဇွန်လ(၃၀)ရက်နေ့က မိုင်းဖုန်းဒေသသို့ နဂါးနှစ်ကောင်ဆရာတော်နှင့် ဒေသအုပ်ချုပ်ရေးဆိုင်ရာ အကြီးအကဲများက သွားရောက် ကြည့်ရှု့စစ်ဆေးခဲ့ကြသည်။
ထိုသို့ သွားရောက် ကြည့်ရှု့စစ်ဆေးရာမှာ နဂါးနှစ်ကောင်ဆရာတော် နှင့် စစ်ဗျူဟာ(အခြေချ) တာချီလိတ် စစ်ဗျူဟာမှူး ဗိုလ်မှူးကြီး သောင်းထိုက်ရွှေ၊ ခရိုင်အုပ်ချုပ်ရေးမှူး ဦးသောင်းတင်ထွေး၊ ခရိုင်ရဲတပ်ဖွဲ့မှူး ဒု-ရဲမှူးကြီး နေမျိုးထွဋ်၊ တာချီလိတ်မြို့နယ် အုပ်ချုပ်ရေးမှူး ဦးရဲထူး၊ မိုင်းဖုန်းကျောင်း ဂေါပကအဖွဲ့ဝင်များ၊ ပြည်ခိုင်းဖြိုးပါတီမှ တာဝန်ရှိသူများ၊ ကျေးရွာအုပ်ချုပ်ရေးမှူးများအပြင် အခြားသောတာဝန်ရှိပုဂ္ဂိုလ်များ လိုက်ပါလာခဲ့တာကို တွေ့ရသည်။
အဆိုပါအဖွဲ့တို့သည် မိုင်းဖုန်းသာသနာနယ်မြေအတွင်းရှိ မိုင်းဖုန်းဆရာတော်၏ ကျောင်းဆောင်များအား လိုက်လံကြည့်ရှုကြရာ ဆရာတော်၏ ကျောင်းဆောင်တံခါးပေါက်မှာ သော့ဖြင့်ခတ်၍ ချိတ်ပိတ်ထားသော်လည်း ဘေးတစ်ဖက် ပြုတင်းပေါက်မှတဆင့် ၀င်ရောက်ထားသည်ကိုလည်း တွေ့ရှိရသည့်အပြင် အဆိုပါကျောင်းဆောင်၏ ဘေးရှိ ၀ရံတာတွင် သစ်များမှာ ဆွေးမြေ့နေပြီး ကျိုးပဲ့ပျက်စီးမှုများဖြစ်ပေါ်နေသည်ကိုလည်း တွေ့ရသည်။
ထိုမှတဆင့် တစ်ပင်တိုင်မြနန်း( မြနန်းဆောင်)ဟု ခေါ်သော မျှော်စင်တွင် အတွင်းစတီးတံခါးများကို သော့ဖြင့် ခတ်ထားသော်လည်း မသမာသူများက ဖျက်စီးဝင်ရောက်ကာ အပေါ်ထပ်ရှိ ရှေးဟောင်းဘုရားများကို ခိုးယူသွားခဲ့သည့်နောက် ရှေးဟောင်းဘုရားမဟုတ်သော ရုပ်ပွားတော်ဆင်းထု အနည်းအငယ်သာ ကျန်ရှိခဲ့သည်။
နှီးဘုရားတည်ရှိရာ ကျောင်းဆောင်သို့သွားရောက် ကြည့်ရှု့စစ်ဆေးသည့်အခါမှာလည်း ပျက်စီးဆုံးရှုံးမှုအနည်းသာတွေ့ရှိရပြီး နမ့်ခေါင်ကျောင်းဆောင်သို့ သွားရောက် ကြည့်ရှုသည့်အခါမှာ အဆိုပါကျောင်းဆောင်သည် ကျွန်းသစ်များဖြင့် အလှဆင်ထားသည်ဖြစ်တာကြောင့် ၀ရံတာများ၊ ကြမ်းခင်းများ နှင့် အချို့သောနေရာများမှာ ပျက်စီးယိုယွင်းနေပြီး ကျောင်းဆောင်အတွင်းမှာလည်း ပျက်စီးမှုများဖြစ်ပေါ်နေသည်ကို တွေ့ရှိရသည်။
အဆိုပါကိစ္စနှင့်ပတ်သက်၍ နဂါးနှစ်ကောင်ဆရာတော်မှ မိုင်းဖုန်းဆရာတော်ပြန်မကြွလာမီ ပြုပြင်စရာများကို ပြုပြင်နိုင်ရန်အတွက် ပြန်လည်ပြုပြင်မွမ်းမံရေးကော်မတီဖွဲ့စည်း၍ လုပ်ဆောင်သွားရန်အတွက် မိန့်ကြားသွားခဲ့ပြီး သက်ဆိုင်ရာများနှင့် မိုင်းဖုန်းကျောင်းဂေါပကအဖွဲ့များကလည်း ရက်သတ်မှတ်ကာ ပြုပြင်မွမ်းမံမှုများကို ပြုလုပ်သွားမှာဖြစ်ကြောင်း သိရသည်။
၂၀၀၄ခုနှစ် ဇွန်လ(၁၂)ရက်နေ့က ဆရာတော်အား မြန်မာနိုင်ငံဘက်သို့ ပြန်လည်ကြွရောက်ခွင့်မပြုကြောင်းကို ဆရာတော်ထံ လျှောက်ထားရန်အတွက် တာချီလိတ်မြို့နယ် အေးချမ်းသာယာရေးနှင့်ဖွံ့ဖြိုးရေးကောင်စီရုံးမှာ ဒေသ အာဏာပိုင်အဖွဲ့အစည်းများရှေ့၌ မိုင်းဖုန်းဆရာတော်ကျောင်း ဂေါပကအဖွဲ့ဖြစ်သည့် ဦးစိုင်းလုံကီး အပါအ၀င် အဖွဲ့ဝင်(၄)ဦးကို လက်မှတ်ရေးထိုးစေခဲ့ကြသည်။
ယခုအခါမှာ ပြည်ခိုင်ဖြိုးပါတီမှ မိုင်းပျဉ်းပြည်သူ့လွှတ်တော်ကိုယ်စားလှယ် ဦးစိုင်းထွန်းစိန်၊ မိုင်းဆတ်ပြည်သူ့လွှတ်တော်ကိုယ်စားလှယ် ဦးခတ္တိယ နှင့် မိုင်းတုံပြည်သူ့လွှတ်တော်ကိုယ်စားလှယ် ဦးစိုင်းအောင်ကြည်တို့မှ ပထမအကြိမ် ပြည်သူ့လွှတ်တော် တတိယပုံမှန်အစည်းအဝေးတွင် တင်သွင်းသည့် အဆိုကြောင့် ပြည်နယ်အစိုးရအဖွဲ့၏ (၈.၂.၂၀၁၃)ရက် နေ့စွဲပါ စာအမှတ်၊(၁၄၂၁)/ ၅ -၁၃၃/ အစရ(ရှမ်း) ၏ ခွင့်ပြုသဘောတူညီချက်ကြောင့် (၁၂.၆.၂၀၀၄)ရက်နေ့က ရေးထိုးခဲ့သော ကိစ္စကို ၂၀၁၃ခုနှစ် ဖေဖော်ဝါရီလ(၁၅)ရက်နေ့က တာချီလိတ်ခရိုင်အထွေထွေအုပ်ချုပ်ရေးဦးစီးဌာနမှ ပြန်လည်ရုပ်သိမ်းကြောင်း အမိန့်ထုတ်ပြန်လိုက်သည်ဖြစ်သည့်အတွက် ယခုအခါမှာ မိုင်းဖုန်းဆရာတော်အား ပြန်လည်ပင့်ဆောင်ရန်ကြိုးစားနေကြပြီး ဆရာတော်မှ ပြန်လည်ကြွမြန်းဖို့ကိုတော့ သတ်မှတ်ရက်မသိရှိရသေးကြောင်း သိရသည်။
ကျောင်းအနေအထားနှင့် ပျက်စီးမှု မှတ်တမ်းဓါတ်ပုံများအား ကြည့်ရန်
