တာချီလိတ်ခရိုင် တာလေမြို့နယ်ခွဲရှိ သီရိကျေးရွာမှာ တော်ဝင်မြန်မာမိသားစုက အသစ်ပြန်လည် ဆောက်လုပ်လှူဒါန်းထားတဲ့ "စိန်ဂျိုးဇက် ဘုရားရှိခိုးကျောင်းကြီး"ကို မတ်လ(၁၉)ရက်နေ့မှာ ဖွင့်လှစ်မှာဖြစ်ကြောင်း သတင်းရရှိပါတယ်။

ဘုရားကျောင်းကို ဆောက်လုပ်ရန်အတွက် ပြီးခဲ့သော ၂၀၁၁ခုနှစ် ဧပြီလ(၃)ရက်နေ့က ကျိုင်းတုံသာသနာပိုင် ဂိုဏ်းအုပ်ဆရာတော်ကြီး ပီတာလွီးစ်ကျာခူ နဲ့ ဘုန်းတော်ကြီးများက အုတ်မြစ်ချပေးခဲ့ပြီး အလှူရှင်ဖြစ်တဲ့ တာချီလိတ်မြို့မှ  ဦးကြည်မြင့်(ခ)ကားလို + ဒေါ်နန်းခမ်း(ခ)အားနာ ( တော်ဝင်မြန်မာ မိသားစု)က အသစ်ပြန်လည် ဆောက်လုပ်လှူဒါန်းတာဖြစ်ကြောင်း သိရပါတယ်။ ဆောက်လုပ်ပြီးစီးသွားတဲ့ "စိန်ဂျိုးဇက် ဘုရားရှိခိုးကျောင်းကြီး"ကို ဖွင့်ပွဲအခမ်းအနား ပြုလုပ်မည့်နေ့မှာ ကျိုင်းတုံသာသနာပိုင် ဂိုဏ်းအုပ်ဆရာတော်ကြီး ပီတာလွီးစ်ကျာခူ က ကောင်းချီးပေး၍ ဖွင့်လှစ်ပေးမှာဖြစ်ကြောင်း သိရပါတယ်။ "စိန်ဂျိုးဇက် ဘုရားရှိခိုးကျောင်းကြီး"ကို ဆောက်လုပ်ပြီးစီးပြီး ဖွင့်ပွဲအဖြစ် ပြုလုပ်သည့် အမှတ်တရအနေဖြင့်လည်း ဖွင့်ပွဲသို့လာရောက်သူများကို ကံစမ်းမဲများနှိုက်ပေးမှာ ဖြစ်ကြောင်းလည်း သိရပါတယ်။

၂၀၁၁ခုနှစ် မတ်လ(၂၄)ရက်နေ့ ည(၈း၂၅)နာရီက (၆.၈)ရစ်တာစကေးရှိတဲ့ အင်အားပြင်း ငလျင်ကြီးလှုပ်ခတ်သွားပြီး အဆောက်အဦအတော်များများ ပြိုကျပျက်စီးမှုများဖြစ်သွားခဲ့ရာ သီရိကျေးရွာရှိ ကက်သလစ် ဘုရားရှိခိုးကျောင်းကြီး အပါအ၀င် ပြိုကျပျက်စီးခဲ့ရတာကြောင့် တော်ဝင်မြန်မာ မိသားစုက အခုလို အသစ်ပြန်လည်ဆောက်လုပ်လှူဒါန်းတာဖြစ်တယ်လို့ သိရပါတယ်။