၂၀၁၂ခုနှစ် နိုဝင်ဘာ(၂၇)ရက်နေ့က ထိုင်းနိုင်ငံ မယ်ဆိုင်မြို့ရှိ ကော့ဆိုင်းရပ်ကွက်ထဲမှာ စိတ်ကြွရူးသွပ်ဆေးပြား (၆၀၀၀၀)သိမ်းဆည်းမိကြောင်း ထိုင်းနိုင်ငံအွန်လိုင်းသတင်းတစ်ခုမှ သိရှိရပါတယ်။

ထိုင်းနိုင်ငံ မူးယစ်ဆေးဝါးနိမ်နှင်းရေး နှင့် သက်ဆိုင်ရာ ပူးပေါင်းအဖွဲ့များမှ ၎င်းတို့အနေဖြင့် ရရှိထားသော သတင်းအစအနရ မယ်ဆိုင်မြို့ ကော့ဆိုင်းရပ်ကွက် အုပ်စု(၆)ရှိ အိမ်ခန်းငှားတစ်ခုသို့ ၀င်ရောက် ရှာဖွေစစ်ဆေးသောအခါ ၎င်းတို့အနေဖြင့် တရားခံဟု သတ်မှတ်ထားသည့် (၃)ဦးမှာ စက္ကူဖြူဖြင့်ထုပ်ထားသော စိတ်ကြွဆေးပြား (၂၀၀၀)ပါသည့် အထုပ်(၃၀)ထုတ်ကို အရက်ဖာထဲသို့  စီစဉ်ထုတ်ပိုးထည့်နေတာကိုတွေ့သောအခါမှာ ရဲများက ၀ိုင်းဖမ်းကြပါတယ်။

ထိုသို့ဝိုင်းဖမ်းနေစဉ် တရားခံ(၂)ဦးမှ အကွက်ချောင်း၍ ထွက်ပြေးသွားခဲ့ရာ  (၂)ဦးအနက် (၁)ဦးမှာ ဆိုင်ကယ်ဖြင့် ထိုင်း-မြန်မာနယ်စပ် ရေဆိပ်ဖက်သို့ ထွက်ပြေးလွှတ်မြောက်သွားခဲ့ပြီး ကျန်(၁)ဦးမှာတော့ ထွက်ပြေးမလွှတ်မြောက်ခဲ့ကြောင်း သိရှိရပါတယ်။.

ဝင်ရောက်ရှာဖွေဖမ်းဆီးရာမှ မူးယစ်ဆေးဝါးများနှင့်အတူ ကား(၂)စီး၊ လက်ကိုင်ဖုန်း(၃)လုံး၊ ရွှေဆွဲကြိုး(၁)ကုံး၊ ဟမ်းချိမ်း (၁)ကုံး၊ လက်စွပ်(၁)ကွင်း နှင့် ဘုရားရွှေချရွှေဆွဲသီး(၁)ခုတို့ကို သိမ်းဆည်းလိုက်ပြီး တရားခံ၏ အိမ်၊ ခြံ၊ မြေ၊ ကားများကို အာဏာပိုင်တွေက ချိတ်ပိတ်ထားကြောင်း သိရှိရပါတယ်။

ထိုင်းသတင်း၏ ဖော်ပြချက်တွင် ထိုင်းရဲများ ၀င်ရောက်ဖမ်းဆီးသည့် နေအိမ်တွင် တရားခံဟု ယူဆရသူ မည်မျှရှိကြောင်း တိတိကျကျ မဖော်ပြထားသော်လည်း ၀ိုင်းဖမ်းရာ အမျိုးသမီး(၂)ဦး နှင့် အမျိုးသား(၁)ဦးမှာ အထက်ပါ မူးယစ်ဆေးဝါးများကို သယ်ယူပို့ဆောင်ပေးသူဟု ဖော်ပြထားပြီး မယ်ဆိုင်မြို့ ကော့ဆိုင်းရပ်ကွက်ရှိ နေအိမ်တော်တော်များများမှာ မူးယစ်ဆေးဝါးနှင့် ချိတ်ဆက်မှုရှိနေကြောင်းကို ရေးသားဖော်ပြထားတာကို တွေ့ရှိရပါတယ်။

Photo: Maesai News