ရှမ်းပြည်နယ်၊ အရှေ့ပိုင်းဒေသ တာချီလိတ်မြို့ ပုန်းထွန်ရပ်ကွက်အတွင်းရှိ အခြေခံပညာ အလယ်တန်းကျောင်းတွင် စာသင်ခန်း (၈)ခန်းမှာ မိုးရွာသည့်အခါ မိုးရေစက်များ ယိုကျမှုများ နှင့် သံမံတလင်းမှ ရေများ စိမ့်ထွက်လာမှုကြောင့် ကျောင်းသား၊ ကျောင်းသူ ကလေးသူငယ်များအတွက် အခက်အခဲများစွာ ဖြစ်ပေါ်နေကြောင်းကို ကြားသိရ၍ အခြေအနေအမှန်ကို သိရှိနိုင်ရန် တာချီလိတ်မြို့နယ် အုပ်ချုပ်ရေးမှူး ဦးထွန်းထွန်းဝင်းမှ ယနေ့ ၂၀၁၄ခုနှစ် စက်တင်ဘာလ (၁၀)ရက် ညနေ (၃း၂၅)နာရီ အချိန်က သွားရောက်၍ ကျောင်းအား ကြည့်ရှု့စစ်ဆေးကြောင်း သိရသည်။
"ဒီပုန်းထွန်ကျောင်းက အနိမ့်ပိုင်းဖြစ်နေတော့၊ မိုးရွာတိုင်း အခုလိုပဲ ဖြစ်နေတယ်၊ မြန်မြန်လေး အဆင့်တိုးမြှင့် ဆောက်နိုင်မှ မိုးရာသီကာလတွေမှာ ကလေးတွေအနေနဲ့ စာသင်ကြားပေးနိုင်ဖို့ အဆင်ပြေနိုင်မှာ၊ မဟုတ်ရင်တော့ ဒီအတိုင်းပဲဆိုရင် ရေရှည်မှာ အဆင်ပြေမှာ မဟုတ်ဘူး"ဟု ပုန်းထွန်ကျောင်းရှိ တန်းပြ ဆရာမတစ်ဦးက တာချီလိတ်အွန်လိုင်းသို့ ပြောသည်။
အဆိုပါ ကျောင်း၏ အနေအထားနှင့် ကျောင်း၏တည်နေရာသည် ချိုင့်ဝှမ်းသဖွယ် အတွင်း၌ တည်ရှိနေပြီး မိုးရွာသည့် အခါများတွင် ရေကြီးမှုများ ရေနစ်မြှုပ်မှုများကြောင့် စာသင်ကြားရေးကိစ္စရပ်မှာ မကြာခဏဆိုသလို အခက်အခဲဖြစ်ပေါ်နေလေ့ရှိသော ကျောင်းတစ်ကျောင်းဖြစ်သည့်အတွက် နိုင်ငံတော်အစိုးရ အနေဖြင့် အမြန်ဆုံး အဆင့်တိုးမြှင့် တည်ဆောက်ဖို့လိုကြောင်းကို ကျောင်းသား မိဘများ၏ ပြောဆိုမှုများအား ကြားသိရသည်။
