သတင္း။ ။ ေဇာင္းညီ
***************
( unicode )
တာချီလိတ်၊ မတ်လ(၃)။ ရှမ်းပြည်နယ်အရှေ့ပိုင်း တာချီလိတ်မြို့တွင် ဖေဖော်ဝါရီလ နောက်ဆုံးအပတ် အတွင်း ကမ္ဘာ့ရွှေဈေးနှင့် ဒေါ်လာဈေး အတက်အကျပေါ် မူတည်၍ ကျပ်ငွေ (၁)သိန်းကို ထိုင်းဘတ် (၂၈၀၀) နှင့် (၂၉၀၀)ကြားတည်ငြိမ်လျှက်ရှိပြီး လာမည့်အစိုးရသစ်လက်ထက်တွင် ပိုပြီးတည်ငြိမ်လာနိုင်ကြောင်း တာချီလိတ်ငွေလဲသူများမှ သုံးသပ်ကြသည်။
"ရွှေဈေးတက်တက်ကျကျ ကုန်ပစ္စည်းကူးသန်းရောင်းဝယ်ဖို့အတွက် (၁)ဒေါ်လာကို ကျပ်(၁၂၀၀)ဝန်းကျင်မှာ ထားပြီး၊ ကျပ် (၁)သိန်းကို ဘတ်(၂၈၀၀)နှင့်(၂၉၀၀)ထားရင် မြန်မာငွေကို လုပ်ကိုင်လို့ အဆင်ပြပြေီ။ ဒါတောင် အစိုးရသစ် မတက်သေးဘူး။ အစိုးရသစ်တက်ရင် အခြေအနေတွေ ပြန်ပြောင်းလဲ သွားနိုင်တယ်။"ဟု တာချီလိတ်ငွေလွှဲဝန်ဆောင်မှုမှ ကိုမိုးဟိန်းက ပြောသည်။
၂၀၁၆ခုနှစ် ဖေဖော်ဝါရီလက တာချီလိတ်မြို့တွင် တရုတ်နှစ်သစ်ကူးကာလနှင့် နိုင်ငံရေးအပြောင်းအလဲကြောင့် ကျပ်ငွေ (၁)သိန်းကို ထိုင်းဘတ်(၃၀၀၀)ထိတက်ခဲ့ပြီး ဖေဖော်ဝါရီလ နောက်ဆုံးအပတ်တွင် ဘတ်(၂၈၀၀) ဝန်းကျင်ပြန်လည် ကျဆင်းသွားသည်။
"အရင်လက တာချီလိတ်မှာပဲကျပ် ငွေဈေးတက်တယ်။ အခုလငွေဈေးက ဒီမှာပဲ တက်တာမဟုတ်ဘဲ မြဝတီမှာလဲ တက်နေတယ်။ ကုန်သွယ်မှုများတော့ မြဝတီမှာက ဒီထက်ပိုတက်နေတယ်လို့ သိရတယ်။"ဟု ကိုမိုးဟိန်းက ဆိုသည်။
၂၀၁၆ခုနှစ် မတ်လ (၁)ရက်နေ့က တာချီလိတ်မြို့တွင် ဒေါ်လာဈေး ပြား(၂၀)ကွာဟမှုကြောင့် ကျပ်တစ်သိန်းကို (၂၉၅၀)ဘတ်ထိတက်သွားပြီး မတ်လ(၃)ရက်နေ့မှာ ကျပ်(၁)သိန်းကို ဘတ်(၂၉၃၀)မှ ဘတ်(၃၀၀၀)အထိရှိကြောင်း သိရသည်။
လာမည့်အစိုးရသစ်လက်ထက်တွင် မြန်မာကျပ်ငွေများဖြင့် ကုန်ပစ္စည်းကူးသန်းရောင်းဝယ်ရေးအတွက် လုပ်ကိုင်၍ အဆင်ပြေနိုင်ရန် (၁)ဒေါ်လာကို ကျပ်(၁၂၀၀) ထားပြီး၊ ကျပ်တစ်သိန်းကို ဘတ်(၂၈၀၀)အောက် ကျမသွားနိုင်ဟု တာချီလိတ်ငွေလဲသူများမှ ခန့်မှန်းထားကြသည်။
သတင်း။ ဇောင်းညီ
