တရုတ်နိုင်ငံတွင် ဒီဇင်ဘာလ၏ ပထမ ရက် (၂၀) အတွင်း လူဦးရေ သန်း (၂၅၀) နီးပါးအထိ COVID-19 ကူးစက်ခံထားရဖွယ်ရှိကြောင်း နိုင်ငံ၏ ထိပ်တန်းကျန်းမာရေးအရာရှိများထံမှ ခန့်မှန်းချက်က ပြောထားကြောင်း Bloomberg News နှင့် Financial Times သတင်းဌာတို့က ဒီဇင်ဘာလ (၂၃) ရက်တွင် ဖော်ပြသည်။
အကယ်၍ ထိုခန့်မှန်းချက် မှန်ကန်ခဲ့ပါက ကူးစက်မှုပမာဏမှာ အကြမ်းဖျင်းအားဖြင့် တရုတ်လူဦးရေ (၁.၄) ဘီလီယံ၏ (၁၄) ရာခိုင်နှုန်းဖြစ်ပြီး ယနေ့အထိ ကမ္ဘာတဝန်း အကြီးမားဆုံး COVID-19 ကူးစက်ဖြစ်ပွားမှုလည်း ဖြစ်သည်။
အဆိုပါ ခန့်မှန်းချက် ကိန်းဂဏန်းများကို ဒီဇင်ဘာလ (၂၁) ရက်နေ့က ပြုလုပ်ခဲ့သည့် တရုတ်နိုင်ငံ အမျိုးသားကျန်းမာရေးကော်မရှင် National Health Commission (NHC) ၏ ဌာနတွင်း အစည်းအဝေးတစ်ခုအတွင်း တင်ပြခဲ့ကြောင်း သတင်းဌာန နှစ်ခုလုံးကဆိုသည်။
Bloomberg နှင့် Financial Times တို့က ယခုကိစ္စကို သိရှိထားသူများ သို့မဟုတ် NHC အစည်းအဝေးတွင် ပါဝင်ခဲ့သူများကို ကိုးကား၍ သတင်းဖော်ပြခဲ့ခြင်း ဖြစ်သည်။
NHC ၏ ဒီဇင်ဘာလ (၂၁) ရက် အစည်းအဝေး အကျဥ်းချုပ်တွင် ကူးစက်ဖြစ်ပွားမှုအသစ်ကြောင့် COVID-19 ကူးစက်ခံထားရသည့် လူနာများကို ကုသမှုနှင့်ပတ်သက်၍ အသည်းအသန်း ကြိုးပမ်းခဲ့ကြောင်း ပြောထားသည်။
NHC အစည်းအဝေးမှတ်စုများဟု ရည်ညွှန်းထားသည့် မိတ္တူတစ်စောင်မှာ ဒီဇင်ဘာလ (၂၃) ရက်နေ့က တရုတ်ဆိုရှယ်မီဒီယာတွင် ပျံ့နှံ့ထွက်ပေါ်ခဲ့သည်။
ထိုစာရွက်စာတမ်းများ အစစ်အမှန်ဖြစ်ကြောင်း အတည်မပြုရသေးဘဲ NHC ကို မှတ်ချက်ပေးရန် မေးမြန်းခဲ့ရာ ချက်ချင်း တုံ့ပြန်ခဲ့ခြင်းမရှိကြောင်း CNN က ပြောသည်။
Bloomberg နှင့် Financial Times သတင်းဌာန နှစ်ခုလုံးက လက်ရှိ COVID-19 ကူးစက်ဖြစ်ပွားမှုကို မည်သို့ ကိုင်တွယ်ဆောင်ရွက်ရန် တရုတ်ကျန်းမာရေးအာဏာပိုင်များ၏ ဆွေးနွေးမှုများကို အသေးစိတ် ဖော်ပြခဲ့သည်။
NHC အစည်းအဝေးတွင် တင်ပြခဲ့သည့် ခန့်မှန်းချက်များအနက် ဒီဇင်ဘာလ (၂၀) ရက် တစ်ရက်တည်းတွင် တရုတ်နိုင်ငံတဝန်း လူ (၃၇) သန်း COVID-19 ကူးစက်ခံခဲ့ရသည်ဟု ဆိုသည်။
တရုတ်အစိုးရ၏ တရားဝင် ထုတ်ပြန်ချက်တွင်မူ ဒီဇင်ဘာလ (၂၀) ရက်က ကူးစက်ခံရသူ (၃,၀၄၉) ဦး တွေ့ရှိရကြောင်း ဖော်ပြထားရာ အလွန်သိသာစွာ ကွာခြားနေသည်ကို တွေ့ရသည်။
တရုတ်နိုင်ငံတွင် လက်ရှိကူးစက်မှုလှိုင်းအတွင်း နေ့စဥ် လူ (၁) သန်း COVID-19 ကူးစက်ခံရပြီး လူ (၅,၀၀၀) သေဆုံးဖွယ်ရှိကြောင်း လန်ဒန်အခြေစိုက် အချက်အလက် လေ့လာဆန်းစစ်မှုကုမ္ပဏီ Airfinity Ltd. က ပြောထားပြီး အခြေအနေမှာ လေ့လာဆန်းစစ်မှုထက် ပို၍ပင် ဆိုးရွားနိုင်သည်ဟု ဆိုသည်။
ထိုအတောအတွင်း တရုတ်အစိုးရ၏ COVID-19 ကိန်းဂဏန်းများကို Weibo ကဲ့သို့ တရုတ်ဆိုရှယ်မီဒီယာဝက်ဘ်ဆိုက်တွင် အသုံးပြုသူများကြား မေးခွန်းထုတ်မှုနှင့် မယုံကြည်မှုများ ရှိနေခဲ့သည်။
လက်ရှိအခြေအနေမှာ တရုတ်မြို့များရှိ ဆေးရုံများတွင် အထူးကြပ်မတ်ကုသဆောင် အပါအဝင် လူနာများပြည့်နေပြီး နာရေးစီစဥ်သည့်နေရာများတွင်လည်း မနိုင်မနင်းဖြစ်နေသည့် သတင်းများလည်း နေ့စဥ် ထွက်ပေါ်နေသည်။
တရုတ်နိုင်ငံ အရှေ့ပိုင်း Shandong ပြည်နယ်ရှိ Qingdao မြို့တွင် တစ်ရက်လျှင် လူဦးရေ သန်းတစ်ဝက် COVID-19 ကူးစက်ခံနေရကြောင်း အကြီးတန်း ကျန်းမာရေးအရာရှိတစ်ဦးက ထုတ်ဖော်ပြောခဲ့သည်။
တရုတ်စီးပွားရေးမြို့တော် ရှန်ဟိုင်းမြို့တွင်လည်း ကူးစက်မှုများ မြင့်တက်နေရာ အာဏာပိုင်များက မြို့ခံများကို ခရစ္စမတ်အားလပ်ရက်အတွင်း နေအိမ်တွင်သာ နေထိုင်ကြရန် တိုက်တွန်းထားကြောင်း သိရသည်။
တရုတ်အစိုးရက ၎င်း၏ တင်းကျပ်သော ကပ်ရောဂါတိုက်ဖျက်ရေး မဟာဗျူဟာကို စွန့်လွှတ်ရန် ဆုံးဖြတ်လိုက်မှုနှင့်အတူ COVID-19 ကူးစက်မှုများ တစ်ဟုန်ထိုး မြင့်တက်လာနိုင်ကြောင်း နိုင်ငံ၏ ထိပ်တန်း ကျန်းမာရေးကျွမ်းကျင်သူတစ်ဦးက ဒီဇင်ဘာလ အစောပိုင်းတွင် သတိပေးထားသည်။
အစိုးရသတင်းဌာနက ဒီဇင်ဘာလ (၁၁) ရက်နေ့တွင် ထုတ်လွှင့်ခဲ့သည့် အင်တာဗျူးတစ်ခုတွင် နိုင်ငံ၏ ကူးစက်ရောဂါဆိုင်ရာ ကျွမ်းကျင်သူ Zhong Nanshan က တရုတ်တွင် ပျံ့နှံ့နေသည့် အိုမီခရွန်မျိုးကွဲဗိုင်းရပ်စ်မှာ အလွန်ကူးစက်နိုင်ပြီး ကူးစက်မှုများ တစ်ဟုန်ထိုး မြင့်တက်မှုကို ဦးတည်နိုင်ကြောင်း ပြောခဲ့သည်။
"လက်ရှိ အိုမီခရွန်မျိုးကွဲက အလွန်ကူးစက်နိုင်ပါတယ်။ လူတစ်ဦးကနေ နောက်ထပ် လူ (၂၂) ဦးကို ကူးစက်စေနိုင်ပါတယ်" ဟု ကပ်ရောဂါကာလတစ်လျှောက် တရုတ်အစိုးရ၏ အကြံပေးပုဂ္ဂိုလ်အဖြစ် ဆောင်ရွက်ခဲ့သူ Zhong က သတိပေးသည်။
"လက်ရှိ တရုတ်မှာဖြစ်ပွားနေတဲ့ ကူးစက်မှုက လျင်မြန်စွာ ပျံ့နှံ့နေပြီး ဒီလိုအခြေအနေမှာ ဘယ်လို ပြင်းထန်တဲ့ ကာကွယ်မှုနဲ့ ထိန်းချုပ်မှုလုပ်ပေမဲ့လည်း ကူးစက်မှုကွင်းဆက်ကို လုံးဝ ဖြတ်တောက်ပစ်ဖို့ ခက်ခဲပါလိမ့်မယ်" ဟု ၎င်းက သုံးသပ်သည်။
တရုတ်တွင် ကူးစက်မှုများ မြင့်တက်လာနေပြီး ထိုအခြေအနေကို ကိုင်တွယ်ဆောင်ရွက်ရန် အသင့်ပြင်မထားရသေးဘဲ သန်းနှင့်ချီသည့် သက်ကြီးရွယ်အိုများကို COVID-19 ကာကွယ်ဆေး အကြိမ်ပြည့်ထိုးမပေးရသေးကြောင်းနှင့် ဘဏ္ဍာငွေ မလုံလောက်သည့် ဆေးရုံများကလည်း များပြားလှသော လူနာအရေအတွက်ကို လက်ခံကုသပေးနိုင်စွမ်းမရှိကြောင်း ထိုစဥ်က အင်တာဗျူးတွင် Zhong က ပြောခဲ့သည်။
Source: CNN, AFP, AP, Reuters
