~~~~~~~~⊰❂ unicode ❂⊱~~~~~~~~

ထိုင်းနိုင်ငံတောင်ပိုင်း လိပ်ကျွန်းတွင် ဗြိတိန်နိုင်ငံသားနှစ်ဦး အသတ်ခံရသည့်အမှု အယူခံနှင့်ပတ်သက်၍ ထိုင်းအစိုးရရှေ့နေဘက်မှ နောက်ဆုံး ဖြေရှင်းချက်ကို နို်ဝင်ဘာလ (၁၀)ရက်နေ့တွင် ထိုင်းအယူခံ တရားရုံးသို့ပေးသွင်းထားကြောင်း သိရသည်။

"ကျွန်တော်တို့ ဘက်ကနပြေီးတော့ အောက်တရားရုံးက ကလေးနှစ်ယောက်ကို သေဒဏ်ပေးတာကို မကျေနပ်တဲ့အတွက် ဒီမှုခင်းဖြစ်စဉ်ဟာ ဘာတွေလွဲမှားနေတယ်။ ဘာတွေ လိုအပ်နေတယ်ဆိုတာတွေကို အချက်အလက်တွေနဲ့ တင်ပြပြီးတော့ အယူခံတင်ခဲ့တယ်။ ဒါကို ထိုင်းအစိုးရ တရားစီရင်ရေးဌာန ကနပြေီးတော့ အယူခံတရားရုံးတစ်ခုကို ဖွင့်လှစ်ပြီးတော့ ဆုံးဖြတ်ချက်ပေးခဲ့တဲ့ အောက်တရားရုံးနဲ့ တရားလိုဖြစ်တဲ့ ရဲတပ်ဖွဲ့ကို ဒီအမှုကိစ္စနဲ့ ပတ်သက်ပြီးတော့ အယူခံ ဖြေရှင်းချက်ကို တင်ပြခိုင်းခဲ့တယ်။
ဒါပေမဲ့ သူတို့တင်ခဲ့တာတွေဟာ ခိုင်မာသေချာမှု မရှိတဲ့အတွက် သေချာပြန်ပြင်ပါဦးဆိုပြီးတော့ တင်လိုက် ပယ်လိုက်နဲ့ ပြင်ခိုင်းတာ (၉)ကြိမ်ရှိပြီ။ ဒီနေ့ကတော့ နောက်ဆုံးအနေနဲ့ တင်ခိုင်းတာပေါ့"ဟု MAT(ထိုင်းနိုင်ငံရောက်မြန်မာနိုင်ငံသားများအဖွဲ့ ) ဒါရိုက်တာ ဦးကျော်သောင်းက Tachileik News Agencyသို့ ပြောသည်။

အဆိုပါအမှုမှ မြန်မာနိုင်ငံသားနှစ်ဦးအား ကော့စမွီတရားရုံးက သေဒဏ်ချမှတ်ထားသဖြင့် မေလက တရားခံ တစ်ဦးလျှင် အယူခံစာမျက်နှာပေါင်း (၁၉၈)မျက်နှာပါသည့် အယူခံလွှာနှင့် မူလတရားရုံးမှ အမှုတွဲတို့ကို တင်ပြခဲ့ပြီး ထိုအယူခံတို့ကို ပြန်လည် ဖြေရှင်းလျှောက်လဲ ချက်ပေးရန်အတွက် တရားလိုဘက်အား ထိုင်းအယူခံတရားရုံးက အမိန့် ချထားခြင်းဖြစ်ကြောင်း သိရသည်။

"အဖြေတွေကတော့ နောက်တစ်ပတ်လောက်မှ သိမယ်လို့ထင်ပါတယ်။ စာမျက်နှာပေါင်း (၃၀၀)လောက်ပါတဲ့ အယူခံလွှာကို ဒီနေ့တစ်ရက်တည်း ဖတ်ပြီးဆုံးဖြတ်လို့မရတဲ့အတွက်ပါ။ ဒီကိစ္စကို သူတို့ ပြီးစလွယ်တော့ ဆုံးဖြတ်လို့မရဘူး။ ဒီကိစ္စဟာ ထိုင်းတရားရေးမဏ္ဍိုင်ရဲ့ အစမ်းသပ်ခံဖြစ်သလို ထိုင်းနိုင်ငံရဲ့ ဂုဏ်သိက္ခါနဲ့လည်း ဆိုင်လို့ သူတို့ သတိထားပြီးတော့ ဆုံးဖြတ်မှာပါ။"ဟု ဦးကျော်သောင်းက ပြောသည်။

ထိုင်းအစိုးရရှေ့နေများဘက်မှ အယူခံအပေါ် တိကျခိုင်မာစွာ ပြန်လည်ချေပနိုင်ပါက အမှုမှာ ၂၀၁၇ ခုနှစ် နှစ်ဆန်းပိုင်းတွင် အမိန့် ချမှတ်နိုင်မည်ဖြစ်ပြီး မချေပနိုင်ပါက စောလျင်စွာ အမိန့်ချမှတ်နိုင်မည်ဖြစ်သလို ပြစ်ဒဏ်မှာလည်း လျော့ကျလာဖွယ်ရှိကြောင်း သိရသည်။

၂၀၁၄ ခုနှစ် စက်တင်ဘာလ (၁၅)ရက်နေ့က ဗြိတိန်နိုင်ငံသားနှစ်ဦး လိပ်ကျွန်းတွင် အသတ်ခံခဲ့ရသည့် အမှုနှင့်ပတ်သက်၍ မြန်မာနိုင်ငံသား နှစ်ဦးဖြစ်သည့် ကိုဇော်လင်းနှင့် ကိုဝင်းဇော်ထွန်းတို့မှာ တရားစွဲဆိုခံခဲ့ရပြီး သေဒဏ်ချမှတ်ခံခဲ့ရခြင်းဖြစ်ကြောင်း သိရသည်။

သတင်း - ဇွဲမြတ်