~~~~~~~~⊰❂ unicode ❂⊱~~~~~~~~

၆၉ နှစ်မြောက် လွတ်လပ်ရေးနေ့အထိမ်းအမှတ် ဂုဏ်ပြုညစာစားပွဲအခမ်းအနားကို တာချီလိတ်မြို့တွင် ကျင်းပရာ အခွန်အများဆုံးပေးဆောင်သည့် လုပ်ငန်းများ၊ ဒေသဖွံ့ဖြိုးရေး ပြည်သူ့အကျိုးပြုလုပ်ငန်းများတွင် ပူးပေါင်းပါဝင် ဆောင်ရွက်ခဲ့ကြသည့် ပုဂ္ဂိုလ်များ၊ အသင်းအဖွဲ့များအား ဂုဏ်ပြုမှတ်တမ်းလွှာများ ပေးအပ်ချီးမြှင့် အခမ်းအနားကို တာချီလိတ်မြို၊ ပါလျှံ တရုတ်ဘုံကျောင်းရှိ မင်္ဂလာခမ်းမတွင် ဇန်နဝါရီလ(၄)ရက်နေ့ ညနေ(၆)နာရီအချိန်က ကျင်းပပြုလုပ်သည်။

အဆိုပါအခမ်းအနားတွင် တာချီလိတ်ခရိုင်အုပ်ချုပ်ရေးမှူး ဦးတင်ဝင်းရွှေနှင့် တာဝန်ရှိသူများက ၂၀၁၄ - ၂၀၁၅ ဘဏ္ဍာနှစ်အတွင်း မြန်မာတစ်နိုင်ငံလုံး အခွန်အများဆုံးပေးဆောင်သူ ၁၀၀၀ စာရင်းတွင် ပါဝင်သည့် တာချီလိတ်မှ လုပ်ငန်းသုံးခုအပါအအဝင် ဂုဏ်ပြုမှတ်တမ်းလွှာပေါင်း (၂၁)ခုကို ပေးအပ်ချီးမြှင့်လိုက်ခြင်းဖြစ်သည်။

မြန်မာတစ်နိုင်ငံလုံး အခွန်အများဆုံးပေးဆောင်သူ ၁၀၀၀ စာရင်းတွင် ရွှေနန်းစံကုမ္မဏီက ဝင်ငွေခွန် အဆင့် ၁၁၆၊ ကုန်သွယ်လုပ်ငန်းခွန်အဆင့်၂၆၂ ပေးဆောင်အခွန်စုစုပေါင်း ၈၂၉ သန်းကျော်၊ ရွှေရေကန်ကုမ္မဏီက ဝင်ငွေခွန်အဆင့် ၃၆၈၊ ကုန်သွယ်လုပ်ငန်းခွန်အဆင့် ၃၆၈၊ ပေးဆောင် အခွန်စုစုပေါင်း ၃၄၀ သန်းကျော်၊ ဦးမောင်ဝင်းက ဝင်ငွေခွန်အဆင့် ၉၂၆၊ ကုန်သွယ်လုပ်ငန်းခွန်အဆင့် ၈၇၃၊ ပေးဆောင်အခွန်ငွေ စုစုပေါင်း ၇၄ သန်းကျော်ရှိခြင်းဖြစ်ကြောင်း သိရသည်။

ဂုဏ်ပြုမှတ်တမ်းလွှာများ ပေးအပ်ချီးမြှင့်ရာတွင် ၂၀၁၆ ခုနှစ် ဧပြီလ(၉)ရက်နေ့က တာချီလိတ်မြို့ မကာဟိုခမ်းရပ်ကွက် ရှမ်းစုရွာမီးလောင်မှုဖြစ်စဉ်တွင် အိမ်နီးချင်းပီသစွာဖြင့် မီးသတ်ယာဉ်များဖြင့် အမြန်ဆုံးလာရောက် ဝိုင်းဝန်းကူညီငြိမ်းသတ်ပေးသည့် ထိုငး်နိုင်ငံ မယ်ဆိုင်မီးသတ်တပ်ဖွဲ့၊ မီးလောင်မှုအားငြိမ်းသတ်မှုတွင် စွမ်းစွမ်းတမံ လုပ်ဆောင်ခဲ့ကြသည့် တာချီလိတ်မြို့နယ်မီးသတ်တပ်ဖွဲ့၊ တာချီလိတ်မြို့နယ်အရန်မီးသတ်တပ်ဖွဲ့၊မီးလောင်အိမ်ထောင်စုများ ပြန်လည်ထူထောင်ရေးတွင် ပူးပေါင်းဆောင်ရွက်ကြသည့် ကြက်ခြေနီတပ်ဖွဲ့ နှင့် မကာဟိုခမ်းရပ်ကွက် အုပ်ချုပ်ရေးမှူးတို့အား ဂုဏ်ပြုမှတ်တမ်းများ ချီးမြှင့်လိုက်သည်။

မှုခင်းများဖော်ထုတ်ဖမ်းဆီးရမိရေးအတွက် ခေါင်းဆောင်ကောင်းပီသစွာဖြင့် စီမံခန့်ခွဲကွပ်ကဲမှုပေးနိုင်သည့် ခရိုင်ရဲတပ်ဖွဲ့မှုး ဒုရဲမှူးကြီးထိန်ဝင်း၊ ရှင်းမန်ရတနာရွှေဆိုင် ဖောက်ထွင်းမှုအပါအဝင် ပြည်သူအထိတ် တလန့်ဖြစ်စေသည့် သတင်းများထွက်သည့် မှုခင်းများအား အမြန်ဆုံးဖော်ထုတ်ပေးသည့် ခရိုင်ရဲတပ်ဖွဲ့မှူးရုံးမှ ရဲအုပ်သောင်းရွှေ၊ လူသတ်အလောင်းဖျောက် ကားခိုးရောင်းသည့်အမှုအား ဖော်ထုတ်နိုင်ခဲ့သည့် ဟောင်လိတ်ရဲကင်းစခန်းမှ နယ်ထိန်းရဲတပ်ကြပ် ဂီးဒိုတို့ကိုလည်း ဂုဏ်ပြုမှတ်တမ်းများ ချီးမြှင့်ပေးခဲ့သည်။

ဆန်ဆိုင်းရပ်ကွက် ဆံပင်ညှပ်ဆိုင်၌ဖြစ်ပွားသည့် သေနတ်ပစ်ခတ်မှုဖြစ်စဉ်တွင် သေနတ်ပစ်ခံရသည့် လူနာအား အသက်မီစေရေး အမြန်ဆုံးကူညီပေးသူ နှစ်ဦး၊ လက်နက်ခဲယမ်းနှင့် မူးယစ်ဖမ်းဆီးဖော်ထုတ်ရေးဖြစ်စဉ်တွင် သတင်းပေးပူးပေါင်းဆောင်ရွက်သူများအပါအဝင် ပြည်သူအကျိုးပြုကူညီဆောင်ရွက်ခဲ့သူများအား ဂုဏ်ပြုမှတ်တမ်းများ ပေးအပ်ချီးမြှင့်လိုက်ခြင်းဖြစ်သည်။

အဆိုပါအခမ်းအနားသို့ မိုင်းဖြတ်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးလင်းဇော်ထွန်း၊ တာချီလိတ်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဌေးဝင်း၊ စစ်ဗျူဟာအဖွဲ့(အခြေချ) တာချီလိတ်မှ စစ်ဗျူဟာမှူး ဗိုလ်မှူးကြီး ကျော်ကိုထိုက်၊ တာချီလိတ်ခရိုင် အုပ်ချုပ်ရေးမှူး ဦးတင်ဝင်းရွှေ၊ တာချီလိတ်မြို့နယ် အုပ်ချုပ်ရေးမှူး ဦးထွန်းဝင်းအောင် နှင့် ဌာနဆိုင်ရာများ၊ လူမှုရေးအသင်းအဖွဲ့များ၊ တိုင်းရင်းသား ယဉ်ကျေးမှု အသင်းအဖွဲ့များ၊ နိုင်ငံရေးပါတီများ နှင့် စီးပွားရေးလုပ်ငန်းရှင်များ အပြင် ထိုင်းနိုင်ဘက်မှ ဧည့်သည်တော်များ တက်ရောက်ခဲ့ကြသည်။