~~~~~~~~⊰❂ unicode ❂⊱~~~~~~~~

တာချီလိတ်မြို့၊ မကာဟိုခမ်းရပ်ကွက်ရှိ နေအိမ်တစ်အိမ်အတွင်း ဖောက်ထွင်းခိုးယူသည့် အသက်(၁၉)နှစ်အရွယ် အမျိုးသမီးတစ်ဦးကို ပြစ်မှုကျူးလွန်သည့် နေ့မှာပင် မြို့မသုသာန်အနီးတွင် ဖမ်းဆီးရမိကြောင်း တာချီလိတ်မြို့မရဲစခန်းမှ သိရသည်။

ဒီဇင်ဘာလ (၈)ရက်နေ့ ညနေ(၅)နာရီဝန်းကျင်က တာချီလိတ်မြို့၊ မကာဟိုခမ်းရပ်ကွက်၊ ယာမြေကုန်းရှိ နေအိမ်တစ်အိမ်တွင် အိမ်ရှင် အိမ်သစ်တက်သွားနေခိုက် အတွင်းပစ္စည်းများ ဝင်ရောက်ခိုးခံရကြောင်း သိရ၍ ဆယ်အိမ်မှူးမှ နယ်ထိန်းရဲကို ဖုန်းဆက်အကြောင်းကြားရာ ရဲတပ်ဖွဲ့မှ တရားခံအား လိုက်လံရှာဖွေ၍ ဖမ်းဆီးနိုင်ခဲ့ကြောင်း သိရသည်။

“အဲဒီ အမျိုးသမီးက အိမ်ရှင်တွေ အိမ်သစ်တက်ပွဲသွားနေတော့ အိမ်ရှင်မရှိဘူးဆိုပြီး အိမ်ရှေ့တံခါးကို ဓားနဲ့ ကန့်လန့်ပြီး အထဲမှာ သိမ်းထားတဲ့ ရွှေတွေ၊ ငွေတွေကို ဝင်ခိုးသွားတာ။ ဖြစ်ချင်တော့ သူ့ရဲ့ လက်ကိုင်အိတ် နဲ့ အနွေးအင်္ကျီက အဲ့ဒီအိမ်မှာပဲ ကျန်ခဲ့တဲ့အပြင်၊ အိမ်ရှင်ကောင်မလေးတစ်ယောက်ရဲ့ အင်္ကျီကို ဝတ်သွားတာ။ အဲ့ဒါနဲ့ ကျွန်တော်လည်း နယ်ထိန်းကို ဖုန်းဆက်ပြီး အမှုမှန်ပေါ်အောင် တရားခံကို ဖမ်းဆီးနိုင်ဖို့ အကြောင်းကြားလိုက်တာပါ။ နယ်ထိန်းတော်လို့ နေ့ချင်းကို ဖမ်းဆီးမိတာလို့ ပြောလို့ရနိုင်တယ် " ဟု ဆယ်အိမ်မှူး ဦးသန်းနိုင်က ပြောသည်။

အခင်းဖြစ်ပွားရာနေရာတွင် တရားခံကျန်ခဲ့သော လက်ကိုင်အိတ်ထဲတွင်မိန်းကလေးအလှပြင်ပစ္စည်းများ နှင့် မူးယစ်ဆေးသုံးစွဲရာတွင် အသုံးပြုသည့် ပိုက်များ၊ ပစ္စည်းများကိုတွေ့ရှိရသောကြောင့် နယ်ထိန်းရဲအဖွဲ့မှ တရားခံအား သုသာန်အနီးတစ်ဝိုက်သို့ သွားရောက် ရှာဖွေခဲ့ရာ မြို့မသုသာန်အနီး သီရိဟံသာ ဘုန်းကြီးကျောင်းရှေ့လမ်းတွင် ယင်းတရားခံသည် ခိုးရာရွှေထည်ပစ္စည်း နှင့် အိမ်ရှင်အင်္ကျီအား ဝတ်ဆင်ထားခြင်းကြောင့် ဖမ်းဆီးနိုင်ခဲ့ကြောင်း ဆယ်အိမ်မှူးထံမှသိရသည်။

ပြစ်မှုကျူးလွန်သူ အသက်(၁၉)နှစ်ရှိ မသေမင်(ခ)လားဟူမ အား တာချီလိတ်မြို့မရဲစခန်းတွင် (ပ)၂၃၃/၂၀၁၆ ရာဇသတ်ကြီးပုဒ်မ ၃၈၀/ကျင့် ၅၄ ဖြင့် အမှုဖွင့်ဆောင်ရွက်ထားကြောင်း သိရသည်။

သတင်း - #ဇောင်းညီ