~~~~~~~~⊰❂ unicode ❂⊱~~~~~~~~

ရှမ်းပြည်နယ်တောင်ပိုင်း တောင်ကြီးမြို့နယ်တရားရုံးတွင် အရှေ့ပိုင်းတိုင်းစစ်ဌာနချုပ်မှ ပိုင်နက်ကျူးလွန်မှု၊ အကျိုးဖျက်ဆီးမှုတို့ဖြင့် တရားစွဲဆိုထားသည့် ရေပူကျေးရွာမှ တောင်သူ ၈၁ ဦးအား ဒီဇင်ဘာလ ၂၂ ရက်တွင် အမိန့်ချလိုက်ကြောင်း သိရသည်။

အမှုပေါင်း ၂၂ မှုအား ရင်ဆိုင်နေရသည့် တောင်သူ ၈၁ ဦးအနက် ၃ ဦးမှာ ယနေ့ရုံးချိန်းမလာသဖြင့် တရားခံပြေးအဖြစ် သတ်မှတ်လိုက်ပြီး အမျိုးသမီး ၃၂ ဦးနှင့် အမျိုးသား ၄၀ ဦး စုစုပေါင်း ၇၂ ဦးအား အလုပ်ကြမ်းနှင့် ထောင်ဒဏ်တစ်လစီ၊ အသက် ၇၀ ကျော် ၅ ဦးအား ဒဏ်ငွေ ကျပ်နှစ်သောင်းစီနှင့် အသက်မပြည့်သေးသည့်အမျိုးသမီးတစ်ဦးအား ဒဏ်ငွေ ကျပ်ငါးရာစီ အမိန့်ချလိုက်ခြင်းဖြစ်ကြောင်း သိရသည်။

“အစိုးရသစ်ကလည်း အခုချိန်ထိတောင်သူကိစ္စတွေကို ပြတ်ပြတ်သားသား မကူညီနိုင်သေးဘူး။ မကူညီနိုင်သေးဘူးဆိုတာကလည်း တောင်သူလယ်သမားဥပဒေနဲ့ ပတ်သက်ရင် လွှတ်တော်မှာတောင် တင်ပြပြီးတော့ တောင်းဆိုရမယ့်အချက်အလက်တွေ၊ ပြုပြင်ပြောင်းလဲရမယ့်ဥပဒေတွေ အများကြီး ရှိနေပါ သေးတယ်” ဟု တရားလွှတ်တော်ရှေ့နေ ဒေါ်ခင်မို့မို့က ပြောသည်။

အရှေ့ပိုင်းတိုင်းစစ်ဌာနချုပ်မှ တရားစွဲဆိုထားသည့် တောင်သူ ၈၁ ဦးအပါအဝင် မြနဒီကုမ္ပဏီကလည်း ပိုင်နက်ကျူးလွန်မှု၊ အကျိုးဖျက်ဆီးမှုဖြင့် တောင်ကြီးမြို့နယ်တရားရုံးတွင် တရားစွဲဆိုထားရာ ရေပူ ကျေးရွာမှ စုစုပေါင်း တောင်သူ ၁၁၃ ဦးမှာ ၂၀၁၅ ခုနှစ် ဒီဇင်ဘာလကတည်းက အမှု ရင်ဆိုင်နေရခြင်းဖြစ်သည်။

“မိရိုးဖလာလုပ်လာတဲ့ တောင်သူတွေရဲ့ အားနည်းချက်က ဥပဒေကို မသိ နားမလည်ဘူး။ စစ်တပ်နဲ့ ပတ်သက်ရင် ကျွန်မအနေနဲ့ ပြောချင်တာက စစ်တပ်ကလည်း အများကြီး တောင်သူအပေါ်မှာ ညှာတာဖို့ လိုပါတယ်။ တောင်သူတွေကလည်း စီမံကိန်းလုပ်နကြေတဲ့ သူဌေးတွေ၊ ခရိုနီတွေလည်းမဟုတ်ဘူး။ စစ်တပ်တွေက တောင်သူတွေကို တရားစွဲမယ့်အစား ညှိနှိုင်းဆောင်ရွက်ခြင်းက ပိုပြီးကောင်းမယ်လို့ထင် ပါတယ်”ဟုဒေါ်ခင်မို့မို့က ဆိုသည်။

အမှုရင်ဆိုင်ရာတွင် တပ်ပိုင်မြေအဖြစ် ပြည်ထဲရေးဝန်ကြီးဌာနမှ ချထားပေးသည့် အထောက် အထားများဖြင့် တင်ပြနိုင်သော်လည်း အမှုရင်ဆိုင်သည့် တောင်သူများအနဖြေင့် အဆိုပါနေရာတွင် တပ်ပိုင်မြေအဖြစ် မသတ်မှတ်မီကတည်းက လုပ်ကိုင်သူများဖြစ်ကြောင်း အထောက်အထားဖြစ်နိုင်သည့် သီးနှံခွန်၊ မြေခွန် ဆောင်ထားခြင်းများကို တင်ပြနိုင်ခြင်းမရှိခြင်း၊ ဥပဒေကို သိရှိမှု အားနည်းခြင်းများ ရှိသည်ဟု တောင်သူများအား အမှုရင်ဆိုင်ရာတွင် ကူညီပေးနေသည့် ဥပဒေအကျိုးဆောင်များထံမှ သိရသည်။

သတင်း - နိုနို