~~~~~~~~⊰❂ unicode ❂⊱~~~~~~~~

၈၈ မျိုးဆက် ငြိမ်းချမ်းရေးနှင့်ပွင့်လင်းလူ့အဖွဲ့အစည်း၏ လယ်ယာစီးပွားနှင့် တောင်သူ လယ်သမားရေးရာဌာနမှ ထုတ်ဝေခဲ့သည့် တောင်ယာခင်းနှင့် သွေးချင်းမျက်ရည် စာအုပ်ပါ အချက် အလက်မှာ ဂုဏ်သိက္ခါကို ထိခိုက်စေသည်ဟုဆို၍ တရားမမှုဖြင့်စွဲဆိုထားမှု ဒီဇင်ဘာလ (၁၅) ရက်တွင် စတင်စစ်ဆေးကြောင်း သိရသည်။

“အခု တရားလိုက ခြံမြေကို မတရား ကျူးကျော်ခဲ့တဲ့လူဆိုပြီး စာအုပ်ထဲမှာ ထုတ်ဝေခဲ့တယ်။ အဲဒီအတွက် ကြောင့် အသရေဖျက်မှုနဲ့ မစွဲခဲ့ဘူး။ နစ်နာကြေးအနေနဲ့ စွဲခဲ့တယ်။ ဘာကြောင့်လည်းဆိုတော့ ဂုဏ်သိက္ခါ တစ်ခုကို ကာကွယ်လိုတဲ့ ဆန္ဒတစ်ခုနဲ့ပါ။ ဒီစာအုပ်က တစ်နိုင်ငံလုံးကိုဖြန့်ဝေတယ်။ ဒါတောင်မကဘူး။ ဘယ်သူမဆို ကူးယူဖြန့်ချိနိုင်တယ် ဆိုပြီးတော့ ထပ်ပြီး ဖြန့်ဝေလိုက်တယ်” ဟု တရားလို အကျိုးဆောင်ရှေ့နေ ဒေါ်ပန်းအိဖြူက ပြောသည်။

ဦးရန်လင်းအောင်က အဆိုပါ စာအုပ်ပါ အချက်အလက်များကြောင့် ဂုဏ်သိက္ခါကို ထိခိုက်စေသဖြင့် နစ်နာကြေး တရားမ အမှုဖြင့် အမှုဖွင့် တရားစွဲဆိုထားခြင်းဖြစ်ပြီး ဒီဇင်ဘာလ ၁၅ ရက်နေ့ ပထမဆုံး ရုံးချိန်းတွင် တရားပြိုင်ဖြစ်သည့် ၈၈ မျိုးဆက် ငြိမ်းချမ်းရေးနှင့်ပွင့်လင်းလူ့အဖွဲ့အစည်းမှ မွန်ပြည်နယ် မော်လမြိုင်ခရိုင် တရားရုံးတွင် လာရောက် တရားရင်ဆိုင်ကြောင်း သိရသည်။

“စာအုပ်မှာပါတဲ့ အချက်ကြောင့် တရားလိုက ကျွန်မတို့ကို လူမှုရေးရာ နစ်နာတယ် ဆိုပြီးတော့ လျော်ကြေး သိန်း ၅၀၀ ရလိုမှု တရားမ နဲ့ တရားဆွဲတာကို အခုကျမတို့ ရုံးကိုလာထွက်တာပါ” ဟု ၈၈မျိုးဆက် ငြိမ်းချမ်းရေးနှင့် ပွင့်လင်းလူမှုအဖွဲ့အစည်း၏ လယ်ယာစီးပွားနှင့် တောင်သူလယ်သမားရေးရာ ဌာနမှ ဒုတာဝန်ခံ ဒေါ်နုနုအောင်က ပြောသည်။

၈၈ မျိုးဆက် ငြိမ်းချမ်းရေးနှင့်ပွင့်လင်းလူ့အဖွဲ့အစည်း၏ လယ်ယာစီးပွားနှင့် တောင်သူလယ်သမားရေးရာ ဌာန မှ ဦးထွန်းမင်းအောင်၊ ဦးမျိုးသန့်၊ ဒေါ်နုနုအောင် တို့ (၃) ဦးကို စွဲဆိုထားခြင်းဖြစ်ကြောင်း သိရသည်။

“ကျွန်မတို့က လူပုဂ္ဂိုလ်တစ်ဦးတစ်ယောက်ကို ထိခိုက်နစ်နာစေတဲ့ ရည်ရွယ်ချက်နဲ့ ရေးထားတာ မဟုတ်ပါဘူး။ ကျွန်မတို့ အများပြည်သူအတွက် အကျိုးရှိမယ့်ဟာကို ကျွန်မတို့အဖွဲ့က ရပ်တည်ချက် ခိုင်ခိုင်မာမာနဲ့ ဆက်လက် ရပ်တည်သွားမှာပါ” ဟု ဒေါ်နုနုအောင်က ပြောသည်။

စာအုပ်ပါ အချက်အလက်များသည် အဖွဲ့ထံလာရောက် တိုင်ကြားသည့် အချက်အလက်များကို ပြည်နယ်အလိုက်၊ တိုင်းအလိုက် စာရင်းများပြုလုပ်၍ အများပြည်သူများ သိရှိရန်၊ ဌာနဆိုင်ရာများ၊ တာဝန်ရှိသူများ အမြန်ဆုံး ဖြေရှင်းနိုင်ရန် ၂၀၁၅ ခုနှစ် အောက်တိုဘာလတွင် အခမဲ့ ထုတ်ဝေသည့် စာအုပ်တွင် ဖော်ပြထားခြင်းဖြစ်ကြောင်း သိရသည်။

 “ကျွန်တော်တို့ ထုတ်ခဲ့တဲ့ စာအုပ်တွေထဲမှာဆိုရင် တရားစွဲခံရတာ ဒါပထမဆုံးပါပဲ။ ဒီထဲမှာဖော်ပြထားတာ တစ်ချို့ဆိုရင် တပ်ပိုင်းဆိုင်ရာက အရာရှိကြီးတွေလည်းပါတယ်။ အငြိမ်းစားယူလိုက်တဲ့ အရာရှိတွေလည်းပါ ပါတယ်”ဟု ၈၈ ငြိမ်းချမ်းရေးနှင့် ပွင့်လင်းလူမှုအဖွဲ့အစည်း၏ လယ်ယာစီးပွားနှင့် တောင်သူ လယ်သမားရေးရာ ဌာနမှ ဒုတာဝန်ခံ ဦးမျိုးသန့်က ပြောသည်။

ပထမဆုံးအကြိမ်ဖြစ် ခေါ်ယူသည့် ရုံးချိန်းတွင် ၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်းမှ ဦးမင်းကိုနိုင်၊ ဒေါ်နီလာသိန်း၊ ဦးထွန်းမင်းအောင်၊ ဦးမျိုးသန့်၊ ဒေါ်နုနုအောင် နှင့် ၈၈ မျိုးဆက်မှ အဖွဲ့ဝင်များ တက်ရောက်ခဲ့ပြီး တရားလိုဘက်တွင် အကျိုးဆောင်ရှေ့နေ ဒေါ်ပန်အိဖြူ တစ်ဦးသာ တက်ရောက်ခဲ့သည်။

ထိုအမှုနှင့် ပတ်သက်၍ လာမည့် ၂၈ ရက်နေ့တွင် ဒုတိယအကြိမ် ရုံးချိန်း ပြန်လည် ချိန်းဆိုထားကြောင်း သိရသည်။

သတင်း/ဓာတ်ပုံ - ခတ္တာနွန်