ရှမ်းပြည်နယ်မြောက်ပိုင်း လားရှိုးမြို့၏ ပထမဦးဆုံး တန်ဆောင်တိုင်မီးပုံးပျံပွဲအား စက်သုံးဆီအရောင်းဆိုင် များမှ ကန့်ကွက်ကြောင်း သတင်းထွက်ပေါ်နေသော်လည်း မူလအစီအစဉ်အတိုင်း ကျင်းပမည်ဖြစ်ကြောင်း ပွဲကျင်းပရေး လုပ်ဆောင်နေသည့် ကုမ္ပဏီ၏တာဝန်ရှိသူက အတည်ပြုပြောကြားသည်။

“ကောလဟလတွေပါ။ ဘယ်သူမှ မကန့်ကွက်ပါဘူး။ အများအတွက်လုပ်ပေးလည်း တစ်ချို့သောသူတွေက ဘေးထိုင်ဘုပြော လျှောက်ဖွကြတာပါ”ဟု Shining Myanmar Co.ltd မန်နေဂျင်းဒါရိုက်တာ ဦးကျော်စွာထွဋ္ဋ်က Tachileik News Agencyသို့ ပြောသည်။

လားရှိုးမြို့Shining Myanmar Co.ltd က ၎င်းတို့တည်ဆောက်နေသည့် လားရှိုးမြို့ရပ်ကွက် ( ၁ ) နမ့်ခိုက်ကျေးရွာအနီးရှိ ချယ်ရီမြိုင်အိမ်ယာဝင်းအတွင်း တန်ဆောင်တိုင်မီးပုံးပျံလွှတ်တင်ပွဲနှင့် နိဗ္ဗာန်ဈေး ပွဲတော်ကို နိုဝင်ဘာလ (၁၄) ရက်နေ့ တွင် ကျင်းပရန် စီစဉ်ထားခြင်းဖြစ်သည်။

 “ ကျွန်မတို့တော့မသိဘူး။ တစ်ချို့ဆိုင်တွေက မီးပုံးပျံပွဲ ဒီနားမှာ လာလုပ်မယ်ဆိုတာတောင် မသိတဲ့သူတွေရှိတယ်”ဟု လားရှိုးမြို့ ဓါတ်ဆီအရောင်းဆိုင်တစ်ဆိုင်မှ ပိုင်ရှင်အမျိုးသမီးက ပြောသည်။

မတော်တဆ မီးပုံးပျံပျက်ကျခြင်းနှင့် မီးပုံးပျံများတွင် ပါဝင်သည့် မီးရှုးများလာရောက်ထိမှန်ခြင်းများဖြစ်ပါက မီးဘေးအန္တရာယ်စိုးရိမ်သည့်အတွက် လောင်စာဆီအရောင်းဆိုင်အချို့က ကန့်ကွက်စာတင်ထားသည်ဟု သတင်းများထွက်ပေါ်လာခြင်းဖြစ်သည်။

“သိရသလောက်တော့ မီးပုံးပျံလွှတ်တင်ဖို့ လေတိုက်တဲ့လမ်းကြောင်းတွေ အနေအထားတွေကို သူတို့တစ်ပတ်လောက် လေ့လာထားတယ်လို့ကြားတယ်ဗျ။ ပွဲကတော့ မပျက်စေချင်ပါဘူး။ ကျွန်တော်တို့ လားရှိုးမြို့ရဲ့ပထမဆုံး မီးပုံးပျံပွဲကို အောင်အောင်မြင်မြင် ဖြစ်မြောက်စေချင်တယ်”ဟု လားရှိုးမြို့မှ ကိုဆန်းဦးက ပြောသည်။

အဆိုပါ မီးပုံးပျံပွဲတွင် နိဗ္ဗာန်ဈေးဆိုင်ခန်း (၅၀၀) ပါဝင်မည်ဖြစ်ပြီး စိန်နားပန် မီးပုံးပျံနှစ်လုံးနှင့် ညမီးကြီးမီးပုံးပျံ(၂)လုံးအပြင် မီးပုံးပျံပေါင်း (၁၀၈၀) လုံးကို လွှတ်တင်သွားမည်ဖြစ်ကြောင်း သိရသည်။

သတင်း - စံပယ်သက်

~~~~~~~~⊰❂ unicode ❂⊱~~~~~~~~

⊰❂ #TachileikNewsAgency #TachileikOnlineNews www.tachileik.net  ❂⊱

~~~~~~ ကြော်ငြာ ~~~~~~