ရှမ်းပြည်နယ်အရှေ့ပိုင်း တာချီလိတ်မြို့ မကာဟိုခမ်းရပ်ကွက် အုပ်ချုပ်ရေးမှူးရွေးချယ်ရာတွင် ဝင်ရောက် အရွေးချယ်ခံသူ ခြောက်ဦးအနက် လက်ရှိရပ်ကွက်အုပ်ချုပ်ရေးမှူး ပြန်လည်ရွေးချယ်ခံရကြောင်း သိရသည်။
မကာဟိုခမ်းရပ်ကွက် အတွက် ရပ်ကွက်အုပ်ချုပ်ရေးမှူး ရွေးချယ်ခြင်းကို ဇန်န၀ါရီလ(၂၁)ရက်နေ့ မွန်းလွဲ(၁)နာရီ ၀န်းကျင်က တာချီလိတ်မြို့ မဟာမြတ်မုနိဘုရားကြီးကျောင်းတိုက်အတွင်း၌ ဆောင်ရွက်ခဲ့ခြင်း ဖြစ်သည်။
"ကျွန်တော့်ကို ရွေးချယ်တဲ့အတွက် တတ်နိုင်သလောက် အစွမ်းရှိသလောက် အားသွန်ခွန်စိုက် ရပ်ကွက်အတွက် ဆောင်ရွက်သွားမှာပါ။ ကျွန်တော့်အနေနဲ့ ပြောမှား ဆိုမှား ရှိခဲ့မယ်ဆိုရင်လည်း ထောက်ပြပေးပါ"ဟု ပြန်လည် ရွေးချယ်ခံလိုက်ရသည့် မကာဟိုခမ်း ရပ်ကွက်အုပ်ချုပ်ရေးမှူး ဦးစိုင်းခမ်းဟိန်းကပြောသည်။
မကာဟိုခမ်းရပ်ကွက် အုပ်ချုပ်ရေးမှူး တာဝန်အတွက် လက်ရှိ ရပ်ကွက်အုပ်ချုပ်ရေးမှူး ဦးစိုင်းခမ်းဟိန်း အပါအဝင် ဦးစိုင်းပန်းအောင်၊ ဦးထွန်းခိုင်၊ ဦးစိန်လွင်၊ ဒေါ်နန်းကေသီ နှင့် ဦးအောင်နိုင်ဝင်းတို့က ၀င်ရောက်ယှဉ်ပြိုင်ကြပြီး မဲပေးသူ ဆယ်အိမ်မှူး (၈၃)ဦးအနက် ဦးစိုင်းခမ်းဟိန်းမှ (၆၃)မဲ ရရှိကာ ပြန်လည် ရွေးချယ်ခံရခြင်းဖြစ်သည်။
ရွေးချယ်ခံရသော ရပ်ကွက်အုပ်ချုပ်ရေးမှူးလောင်းများ၏ အမည်စာရင်းများကို အတည်ပြုပေးနိုင်ရန် အတွက် ဇန်န၀ါရီလ (၂၆)ရက်နေ့တွင် မြို့နယ်အုပ်ချုပ်ရေးမှူးထံ တင်ပြရမည်ဖြစ်ပြီး ထိုမှတစ်ဆင့် ခရိုင်သို့ တင်ပြပြီးမှသာ စိစစ်ပြီး အတည်ပြုပေးမည်ဖြစ်ကြောင်း သိရသည်။
အခြေခံဖွဲ့စည်းပုံဥပဒေအရ မြန်မာနိုင်ငံတ၀န်းလုံးရှိ ရပ်ကွက်/ကျေးရွာ အုပ်ချုပ်ရေးမှူးများအား ၂၀၁၆ခုနှစ် ဇန်န၀ါရီလအတွင်း အသစ်ပြန်လည် ရွေးချယ်နေခြင်းဖြစ်ပြီး ရပ်ကွက်အုပ်ချုပ်ရေးမှူး ရွေးချယ်မှုကို ဇန်န၀ါရီလ (၂၅)ရက်နေ့ နောက်ဆုံးထားကာ ရွေးချယ်ရမှာဖြစ်သည်။
သတင်း/ဓါတ်ပုံ။ ။ ဇောင်းညီ
⊰❂ #TachileikNewsAgency #TachileikOnlineNews www.tachileik.net ❂⊱
~~~~~~~~~~ ကြော်ငြာ ~~~~~~~~~
