~~~~~~~~⊰❂ Unicode Version ❂⊱~~~~~~~~

"တာချီလိတ်က အဓိက နယ်စပ်က ထိုင်းနိုင်ငံနဲ့ ဆက်စပ်နေတာပေါ့။ ထိုင်းနိုင်ငံမှာတော့ လတ်တလော ဒီရောဂါ မကျရောက်သေးဘူးလို့ သိရတယ်။ ဒါပေမဲ့ အချိန်မရွေး ကျရောက်လာနိုင်တဲ့အတွက် တာချီလိတ်ခရိုင် မွေးမြူရေးနဲ့ ကုသရေးဦးစီးဌာနအနေနဲ့လည်း ကြိုတင်ကာကွယ်ရေးအနေနဲ့ စီးပွားဖြစ်ဝက်မွေးမြူရေးခြံတွေမှာ ဇီဝလုံခြုံရေးလုပ်ငန်းစဉ်တွေ သေချာဆောင်ရွက်ဖို့၊ ပိုးသတ်ဆေးဖြန်းဖို့၊ ခြံအဝင်အထွက်ကို ထိန်းချုပ်ဖို့၊ ပြင်ပကဝက်နဲ့ဝက်ထွက်ပစ္စည်းတွေ ခြံတွင်းမသယ်ဆောင်ဖို့ ပြောကြားထားပါတယ်။ တစ်ပိုင်တစ်နိုင် မွေးမြူရေးသမားတွေအတွက်လည်း ခြံသန့်ရှင်းရေးလုပ်ဖို့နဲ့ ပြင်ပက စားကြွင်းစားကျန်တွေကို ယူပြီးမကြွေးဖို့ ညွှန်ကြားထားပါတယ်"ဟု တာချီလိတ်ခရိုင် မွေးမြူရေးနှင့် ကုသရေးဦးစီးဌာနမှ ဒုတိယညွှန်ကြားရေးမှူး ဒေါက်တာနေလင်းက တာချီလိတ်သတင်းအေဂျင်စီသို့ ပြောသည်။

တာချီလိတ်မြို့ရှိ ဝက်ကောင်ရေထောင်နှင့်ချီ၍မွေးမြူသည့် စီးပွားဖြစ်ဝက်မွေးမြူရေးခြံ (၁၀)ခြံတွင် ကာကွယ်ဆေးများ ပုံမှန်ထိုးနှံပေးခြင်း အပါအဝင် စနစ်တကျမွေးမြူရေးကို မွေးမြူရေးနှင့် ကုသရေးဦးစီးဌာနက လမ်းညွှန်ဆောင်ရွက်ပေးနခြေင်းဖြစ်ပြီး အသားထုတ်လုပ်ခြင်းကို စည်ပင်သာယာရေးဦးစီးဌာနမှ စစ်ဆေးအတည်ပြုသည့် ထောက်ခံချက်များဖြင့် ထုတ်လုပ်ရောင်းချရခြင်းဖြစ်ကြောင်း သိရသည်။

"ဝက်တွေကို ပုံမှန်ကာကွယ်ဆေးလည်း ထိုးပါတယ်။ စည်ပင်ရဲ့ စစ်ဆေးချက်နဲ့ အသားတွေ ထုတ်လုပ်ရောင်းချတာဖြစ်ပါတယ်"ဟု ရွှေကောင်းကင်ဝက်မွေးမြူရေးခြံမှ ဒေါ်နှင်းယုဝေက ပြောသည်။

တာချီလိတ်မြို့ပေါ်ရှိ စီးပွားဖြစ်ဝက်မွေးမြူရေးခြံများကို ပုံမှန်စစ်ဆေးခြင်းအပြင် အာဖရိကဝက်အပြင်းဖျားရောဂါ ကာကွယ်ရေးအတွက် ဇီဝလုံခြုံရေးစနစ်မြှင့်တင်ရေးစစ်ဆေးခြင်းကို စည်ပင်သာယာရေးဌာနနှင့် တိရစ္ဆာန်မွေးမြူရေးနှင့်ကုသရေးဦးစီးဌာနတို့ ပူးပေါင်း၍ စစ်ဆေးလုပ်ဆောင်ထားသည့်အပြင် မယ့်ဖားလုံဖောင်ဒေးရှင်းနှင့် တိရစ္ဆာန်မွေးမြူရေးနှင့်ကုသရေးဦးစီးဌာနတို့ပူးပေါင်းကာ ခရိုင်အတွင်းရှိ တစ်ပိုင်တစ်နိုင်မွေးမြူရေးခြံများကိုလည်း ဇီဝလုံခြုံရေးစစ်ဆေးခြင်း၊ အသိပညာပေးခြင်းတို့ကို လုပ်ဆောင်ထားကြောင်း သိရသည်။

သတင်း - ဟန်စိုးထိုက်
ဓာတ်ပုံ - ကျော်ဇင်ဟန်း