~~~~~~~~⊰❂ Unicode Version ❂⊱~~~~~~~~

မြန်မာ - ထိုင်းနယ်စပ်ဒေသ၊ တာချီလိတ်မြို့တွင်း လုံခြုံရေးအတွက် လမ်းဆုံမီးပွိုင့်များနှင့် အရေးကြီး နေရာများတွင် CCTV များ တပ်ဆင်ရန် လတ်တလောတွင် ကိုယ်ထူကိုယ်ထစနစ်ဖြင့် ဆောင်ရွက်သွားမည် ဖြစ်ပြီး နိုင်ငံတော် ဘတ်ဂျက်လည်း တင်ပြတောင်းခံသွားမည်ဖြစ်ကြောင်း တာချီလိတ်ခရိုင် အုပ်ချုပ်ရေးမှူးက ပြောကြားလိုက်သည်။

“လက်ရှိမှာလည်းမြို့ထဲမှာ တပ်ထားတဲ့ CCTV တွေ ရှိပြီးသားပါ။ တစ်ချို့တွေကျတော့ တပ်ထားတာ ကြာတော့ အလုပ် မလုပ်တော့ဘူးပေါ့။ အလုပ်လုပ်နေတဲ့ CCTV တွေလည်းအများအပြား ရှိပါတယ်။ အဓိက က ကျွန်တော်တို့က တံတား (၁) တို့ (၂) တို့၊ ဗိုလ်ချုပ်အောင်ဆန်းလမ်းမကြီးတို့၊ ရွှေတိဂုံ ဘုရားဘက်ခြမ်းတို့၊ မြို့ပတ်လမ်းတို့ အရေးကြီးတဲ့ပွိုင့်တွေမှာ ကျွန်တော်တို့က တပ်သွားမှာပါ။ ဒါကလည်းကိုယ့်မြို့ကနေ ကိုယ်ထူကိုယ်ထ အစီအစဉ်နဲ့ လုပ်သွားမှာပါ။ တကယ်တော့ တောင်ကြီးတို့ ကျိုင်းတုံတို့ဆို နိုင်ငံတော်ကနေ ဘတ်ဂျက်ပေးပြီးတော့ ဆောင်ရွက်နေတာတွေ ရှိပါတယ်။ အဲဒီတော့ နိုင်ငံတော်ရဲ့ ဘတ်ဂျက်ကို တောင်းတာတော့ တောင်းမှာပေါ့။ တစ်ဖက်မှာလည်း ကျွန်တော်တို့ နိုင်တဲ့ဘက်က မြို့အတွက် လုံခြုံရေးအတွက်ကလည်း အရေးကြီးနေတော့ ဒါလေးကို အမြန်ဆုံး အကောင်အထည် ဖော်သွားမှာပါ”ဟု တာချီလိတ်ခရိုင်အုပ်ချုပ်ရေးမှူး ဦးမြင့်နိုင်က တာချီလိတ်သတင်း အေဂျင်စီသို့ ဖေဖော်ဝါရီလ (၁၈) ရက်နေ့တွင် ပြောကြားလိုက်ခြင်း ဖြစ်သည်။

မကြာခင် ကာလတွင် မြို့တွင်း CCTV တပ်ဆင်ရန် လှူဒါန်းမည့် ပြည်သူများနှင့် တပ်ဆင်လိုသည့် ကုမ္ပဏီများကို ခေါ်ယူပြီး မြို့မိမြို့ဖများနှင့် တွေ့ဆုံပွဲတစ်ခု ပြုလုပ်ရန် စီစဉ်ထားကြောင်း၊ တွေ့ဆုံပွဲတွင် အရေးကြီးသည့် မီးပွိုင့်များနှင့် CCTV တပ်ဆင်မည့် နေရာများ၊ တပ်ဆင်မည့် ကုမ္ပဏီကို ရွေးချယ်သွားမည် ဖြစ်ကြောင်း၊ ပြည်သူများအနဖြေင့် အဆိုပါပွဲတွင် တက်ရောက်ပြီး အကြံဉာဏ်ပေးရန်လည်း ဖိတ်ခေါ်ကြောင်း၎င်းက ပြောသည်။

CCTV တပ်ဆင်ရန်အတွက် အစိုးရဘတ်ဂျက်အနဖြေင့် အတိအကျ သတ်မှတ်ချက်မရှိသော်လည်း မိမိတို့ ဆောင်ရွက်ရမည့် မြို့ဧရိယာအကျယ်အဝန်းနှင့် လုပ်ဆောင်ရမည့် အသေးစိတ် အချက်အလက်များ ပေါ်မူတည်ပြီး သတ်မှတ်ထားသည့် စံနှုန်းများရှိကြောင်း၊ လက်ရှိတွင် ပြည်နယ်အဆင့်မြို့ကြီးများအတွက် ဘတ်ဂျက်များ ချထားပေးနပြေီး တာချီလိတ်မြို့ အတွက်မှု လက်ရှိဘတ်ဂျက်တွင် မပါဝင်ပါက နောက်နှစ် ဘတ်ဂျက်တွင် ပါဝင်နိုင်ကြောင်း သိရသည်။

“တောင်းခံစရာမလိုဘူး။ ခရိုင်မြို့အဆင့်တွေကို အကုန်လုံးလုပ်မှာဗျ။ သူကအလှည့်ကျ စနစ် လုပ်နေလို့သာ။ ကျိုင်းတုံတို့ ဘာတို့က ပြည်နယ်အဆင့်ဖြစ်လို့ လုပ်တာ။ ဒုပြည်နယ်အဆင့်ဆိုပြီး ထားတဲ့အတွက် လုပ်တာ”ဟု ရှမ်းပြည်နယ်လွှတ်တော် ဒေသန္တရစီမံကိန်းနှင့်ဘဏ္ဍာရေး စီစစ်ရေး ကော်မတီ ဥက္ကဌ၊ ပြည်နယ်လွှတ်တော်ကိုယ်စားလှယ် ဦးခင်မောင်တင့် တာချီလိတ်သတင်းအေဂျင်စီသို့ ပြောသည်။

တာချီလိတ်မြို့တွင်း CCTV များ တပ်ဆင်ရန်အတွက် လက်ရှိတွင် ကျပ်သိန်း(၂၄၀)ရှိထားပြီးဖြစ်သည့် အတွက် အမြန်ဆုံး အကောင်အထည် ဖော်သွားမည်ဖြစ်ကြောင်း သိရသည်။

“မြို့ရဲ့တရားဥပဒေစိုးမိုးရေးပေါ့။ လုံခြုံရေးအခြေအနေအရ ကျွန်တော်တို့ မြို့တွေမှာ CCTV ရှိဖို့ဆိုတာ အဓိက အရေးအကြီးဆုံး အလိုအပ်ဆုံးဖြစ်ပါတယ်။ ကျွန်တော့်ရှေ့က တာဝန်ထမ်းဆောင်ခဲ့တဲ့ ခရိုင်အုပ်ချုပ်ရေးမှူးတွေ လက်ထက်မှာလည်း အကောင်အထည် ဖော်လုပ်ခဲ့ပါတယ်။ မပြီးပြတ် သေးဘူးပေါ့။ မြို့ထဲမှာ CCTV တပ်ဖို့ စပြီးကြိုးပမ်းနေပါတယ်။ အရေးကြီးတဲ့ ပွိုင့်တွေပေါ့ အနည်းဆုံး (၁၇) ပွိုင့်မှာ အလုံး (၃၄) လုံးလောက်တပ်ဖို့ လျာထားတာပေါ့။ အဲဒီအတွက်ကို မြို့မီးလင်းရေးကော်မတီက သိန်း (၂၀၀) လှူဒါန်းထားပါတယ်။ နောက်(Eastern Eagle MC)ဆိုင်ကယ်စီးတဲ့အဖွဲ့က သိန်း (၄၀) လှူဒါန်း ထားတော့ သိန်း (၂၄၀) ရထားပြီးသား ရှိပါတယ်။ အဲဒါတွေကိုဆက်ပြီးတော့ အမြန်ဆုံး အကောင် အထည်ဖော် ဆောင်ရွက်သွားမှာ ဖြစ်ပါတယ်”ဟု ခရိုင်အုပ်ချုပ်ရေးမှူး ဦးမြင့်နိုင်က ပြောသည်။

တာချီလိတ်မြို့တွင်း CCTV များကို စနစ်တကျ ဖြစ်စေရန်အတွက် CCTV Control Center တစ်ခုထားရှိပြီး စောင့်ကြည့်သွားရမည်ဖြစ်ကြောင်း မြို့နယ်ရဲတပ်ဖွဲ့မှူးက ဆိုသည်။

“CCTV တွေကို တစ်နေရာတည်းမှာ တပ်ထားပြီး အသုံးပြုလို့မရဘူး။ CCTV Control Center ကြီး တစ်ခုထားပြီး ထိန်းချုပ်ပြီး ယာဉ်ထိန်းတပ်ဖွဲ့မှာ ဖြစ်ဖြစ် မြန်မာနိုင်ငံရဲတပ်ဖွဲ့ဌာနမှာဖြစ်ဖြစ် ထားပြီး ကြည့်ရှုတဲ့ သူပါထားရမယ်။ ထားပြီးတော့မှ ဘယ်အပိုင်းမှာ မှုခင်းဖြစ်ပွားတယ်။ မှုခင်းဖြစ်ပွားခြင်း မဟုတ်ရင်လည်း နောက်ပြန်ပြီးတော့ ဘယ်နေ့ဘယ်ရက်က လိုလားရင်အကွက်လိုက် အပိုင်းလိုက် ကြည့်ရှုလို့ ရမှာဖြစ်ပါတယ်။ အဲဒါကြောင့်Control Center ကြီးထားရှိဖို့ တွက်ချက်မှုတွေ လုပ်နေတယ်”ဟု တာချီလိတ်မြို့နယ်ရဲတပ်ဖွဲ့မှူးရုံးမှ မြို့နယ်ရဲတပ်ဖွဲ့မှူးရဲမှူးလှဦးက ပြောသည်။

လက်ရှိတွင် တာချီလိတ်မြို့ရှိ မီးပွိုင့်များ၌ ယခင်ကတည်းက တပ်ဆင်ထားသည့် CCTV များမှာ ကောင်းစွာ အလုပ် မလုပ်တော့၍ အသစ်ပြန်လည် တပ်ဆင်ရန်အတွက် လွန်ခဲ့သည့် ၂၀၁၆ခုနှစ် မေလ(၁၁)ရက်နေ့က တာချီလိတ်ခရိုင်အုပ်ချုပ်ရေးမှူးရုံးတွင် ထိုင်းနိုင်ငံ၊ ဘန်ကောက်မြို့ရှိ နည်းပညာကုမ္ပဏီမှ တာဝန်ရှိသူများနှင့် တွေ့ဆုံဆွေးနွေးမှုများ ပြုလုပ်ပြီး ၂၀၁၆ခုနှစ် ဇွန်လအတွင်း တပ်ဆင်သွားရန် စီစဉ် ထားသော်လည်း ၂၀၁၉ခုနှစ် ဇန်နဝါရီလအကုန်အထိ အကောင်အထည်ဖော်နိုင်ခဲ့ခြင်းမရှိသည့်အတွက် မကြာမီကာလတွင် အကောင်အထည်ဖော်နို်င်ရန်အတွက် ဆောင်ရွက်သွားမည်ဖြစ်ကြောင်း သိရသည်။

သတင်း - ဟန်စိုးထိုက်