~~~~~~~~⊰❂ unicode ❂⊱~~~~~~~~

၂၀၁၆ ခုနှစ်က ကျင်းပခဲ့သည့် ဒုတိယအကြိမ်မြောက် Tachileik BIKE WEEK မှ ရရှိခဲ့သည့် အကျိုးအမြတ် ကျပ်သိန်း (၁၀၀)ထဲမှ တာချီလိတ်မြို့နယ်အတွက် တာချီလိတ်ခရိုင်အထွေထွေအုပ်ချုပ်ရေး ဦးစီးဌာနမှ တစ်ဆင့် လှူဒါန်းငွေ ကျပ်သိန်း (၅၀)နှင့် ကျိုင်းတုံမြို့နယ်အတွင်းမှ မိဘမဲ့ ကလေးများကျောင်းများအတွက် ကျပ်သိန်း (၅၀)ကို ကိုယ်တိုင်ကိုယ်ကျ သွားရောက်လှူဒါန်းပေးခဲ့ခြင်းဖြစ်ကြောင်း သိရသည်။

ရှမ်းရိုးမကွင်း၌ (၂)ရက်တာ ကျင်းပမည့် အဆိုပါ ပွဲကာလအတွင်း ဆိုင်ခန်းများရှိသည့် ဧရိယာတွင် ဝင်ကြေးပေးရန် မလိုသော်လည်း သီဆိုဖျော်ဖြေမှုများ ပါဝင်သည့် ဧရိယာအတွင်း ဝင်ရောက်လိုပါက တစ်ဦးလျှင် တစ်ရက်စာ အတွက် ဘတ်(၂၀၀) သတ်မှတ်ကောက်ခံမည်ဖြစ်ကြောင်း သိရပြီး ယခုနှစ်တွင် ယခင်နှစ်များထက် ပို၍စည်ကားစွာ ကျင်းပသွားရန် စီစဉ်ထားကြောင်း သိရသည်။

“အခု လတ်တလော စာရင်းပေးထားတာကတော့ ဘရူနိုင်း၊ အင်ဒို၊ မလေး၊ ထိုင်း၊ စင်္ကာပူ၊ လော(လာအို) က လာမယ်။ ကမ္ဘောဒီးယားကတော့ လှမ်းမေးထားတာ ရှိတယ်။ လာ မလားတော့ မသေချာသေးဘူး။ မြန်မာနိုင်ငံတစ်နိုင်ငံလုံးမှာ Bike Club တွေ ရာနဲ့ချီရှိတယ်။ သူတို့လည်း လာကြမယ်။ မြို့ခံမပါဘဲ ထိုင်း (၆၀၀) ထိုင်း မဟုတ်တဲ့ အခြားနိုင်ငံသားများ (၆၀)လောက်တော့ရှိမယ်။ မြန်မာနဲ့ထိုင်းဆိုရင် (၁၀၀၀)ကျော်လောက် ရှိမယ်။ ဒီနှစ်တော့ ပိုပြီးစည်စည် ကားကားဖြစ်အောင် စီစဉ်ထားပါတယ်”ဟု တာချီလိတ်မြို့အခြေစိုက် Eastern Eagle Motorcycle Club မှ အတွင်းရေးမှူး ကိုနော်ခမ်းက တာချီလိတ်သတင်းအေဂျင်စီသို့ ပြောသည်။

၂၀၁၈ခုနှစ် ဒီဇင်ဘာလ (၁၄)ရက်နေ့တွင် ဖွင့်ပွဲအခမ်းအနားတွင် ယာဉ်ထိန်းရဲတပ်ဖွဲ့မှ ယာဉ်စည်းကမ်း၊ လမ်းစည်းကမ်း ပညာပေးအစီအစဉ်၊ ရှမ်းအဆိုတော် စိုင်းဟန်လင်း၊ အဆိုတော် သအို၊ ဝေလ၊ ဖိုးပြည့်နှင့် ဖြူဖြူကျော်သိန်းတို့၏ သီဆိုဖျော်ဖြေမှုများလည်း ပါဝင်မည်ဖြစ်ကြောင်း သိရသည်။

ညပိုင်းတွင် ကျင်းပမည့် ဒေသ တာဝန်ရှိသူများ၊ နိုင်ငံတကာမှ ဆိုင်ကယ်သမားများနှင့်အတူ ဖွင့်ပွဲ ညစာ စားပွဲတွင် ပါဝင်ဆင်နွှဲလိုသည့် မြို့ခံများအတွက် ညစာစားဝိုင်း (၆၀) ကိုရောင်းချပေးမည်ဖြစ်ပြီး လူ(၈)ဦးစာ ညစာ စားဝိုင်း (၁)ဝိုင်းလျှင် ဘတ် (၅,ဝဝဝ)နှုန်းဖြင့် ရောင်းချပေးမည်ဖြစ်ကာ ဝင်ရောက် လည်ပတ် လိုသူများ အနဖြေင့် တစ်ဦးလျှင် ဘတ်(၂၀၀)ဖြင့် ဝင်ရောက်လည်ပတ်နိုင်ကြောင်း သိရသည်။

ဒီဇင်ဘာလ (၁၅)ရက်နေ့တွင် မဲခေါင်မြစ်ကမ်းသို့ ဆိုင်ကယ်ကွန်ဘွိုင်းဖြင့် စီးနင်းခြင်း အစီအစဉ်တွင် လိုက်ပါ လိုသည့်မြို့ခံများ အနဖြေင့် ကြိုတင်စာရင်းပေးသွင်းနိုင်ကြောင်း သိရပြီး မဲခေါင်မြစ်ကမ်းရှိ အထက(ဝမ်ပုံ)တွင် စုပေါင်းလှူဒါန်းမှုများ၊ လိုက်ပါလာသူများအား နေ့လယ်စာကျွေးမွေးခြင်းများ ပြုလုပ်မည် ဖြစ်ကြောင်း သိရသည်။

ဒီဇင်ဘာလ (၁၅)ရက်နေ့တွင် ချင်းမိုင်မှ နာမည်ကျော် Black Hawk အဖွဲ့၊ Black Head တေးဂီတ အဖွဲ့၊ အဆိုတော် အိုက်ထွန်းတို့၏ ဖျော်ဖြေမှုများ၊ ကောင်းဘွိုင်း ရှိုး၊ ရှမ်းရိုးရာ လမုန်း(လမ်းဝုန်း)အကများဖြင့် ဖျော်ဖြေမှုများ၊ ဆိုင်ကယ်ကလပ်များ မိတ်ဆက်ခြင်း နှင့် လက်ဆောင်ပစ္စည်း လဲလှယ်ခြင်းများ ပါဝင်မည် ဖြစ်ကြောင်း သိရသည်။

[ ပုံများမှာ ၂၀၁၄ ခုနှစ် ၂၀၁၆ခုနှစ်က တာချီလိတ်တွင် ကျင်းပခဲ့သည့် ပုံများ ဖြစ်ပါသည် ]

Tachileik News Agency
ဓာတ်ပုံ - ဇောင်းညီ