~~~~~~~~⊰❂ unicode ❂⊱~~~~~~~~

ရှမ်းပြည်နယ် တာချီလိတ်မြို့တွင် ကားဘက်ထရီခိုးခံရမှုများ မကြာခဏဖြစ်ပွားနေသော်လည်း ရဲစခန်းတွင် အမှုဖွင့်တိုင်ကြားခြင်း မရှိကြောင်း ဒေသခံများထံမှ သိရသည်။

"ကျွန်တော်ကတော့ နှစ်ကြိမ်အခိုးခံရတယ်၊ တစ်ကြိမ်မှာ ကားနှစ်စီးလုံးက ဘက်ထရီနှစ်လုံးပါသွားတာ။ အဲဒီတုန်းက ကားမှန်ရိုက်ခွဲတာတော့ မဟုတ်ဘူး။ ကားတံခါး လော့မချထားတော့ တံခါးဖွင့်ပြီးယူသွားတာ"ဟု ကားဘက်ထရီအခိုးခံလိုက်ရသည့် လူမှုကူညီရေးအသင်းဝင်တစ်ဦးက ပြောသည်။

တာချီလိတ်မြို့လယ် ဗိုလ်ချုပ်လမ်းမဘေးတွင် ရပ်ထားသည့် မော်တော်ယာဉ်၏ ကားမှန်အား ရိုက်ခွဲကာ ကားဘက်ထရီခိုးယူမှု ဒီဇင်ဘာလ(၃)ရက်နေ့ နံနက်အစောပိုင်းက ဖြစ်ပွားခဲ့ကြောင်းလည်း သိရသည်။

"ကျွန်မကတော့ (၃)ကြိမ်တောင် ကားဘက်ထရီ ခိုးခံရတယ်။ ဆန်ဆိုင်းဈေးထဲမှာ တစ်ခါ၊ အိမ်ရှေ့မှာ (၂)ခါ၊ ညပိုင်းပဲ ခိုးခံရတာ။ ဆန်ဆိုင်းဈေးထဲမှာတော့ ကားမှန်ရိုက်ခွဲပြီး ကားဘက်ထရီခိုးတာ။ ဘက်ထရီခိုးရတာနဲ့ ပတ်သက်လို့တော့ ရဲစခန်းတော့ မတိုင်ဖြစ်ပါဘူး"ဟု မကာဟိုခမ်းရပ်ကွက်နေ အမျိုးသမီးတစ်ဦးက ပြောသည်။

ကားဘက်ထရီခိုးယူသူများသည် ကားရှေ့ဖုံးဖွင့်နိုင်ရန်အတွက် ကားတံခါးမှန်အား ရိုက်ခွဲကာ ကားအတွင်းမှ ခလုတ်ကို နှိပ်၍ ကားရှေ့ဖုံးဖွင့်ပြီးခိုးယူကြခြင်း ဖြစ်ကြောင်း သိရသည်။

တာချီလိတ်မြို့တွင် ကားဘက်ထရီခိုးခံရခြင်းများနည်းတူ အသေးစားခိုးမှုများ မကြာခဏဖြစ်ပွားနေကြောင်း ဒေသခံများထံမှ သိရသည်။

ဓာတ်ပုံ။ Yar Bo Shee၊ Ko Hla Moe